Read Thado Chin Thuchihbu 17 Bible Online

Thuchihbu 17 - Thado Chin bible

Thuchihbu 17

¹Lunglhai sela an-gum kamkhat neh hi, kinah puma insung dimset golvah an neh sanga phajo ahi.

²Soh chingtah-in jachatna semdoh chapa chunga vai ahop ding; chule sopiho goulona lah-a chu chan aneiding ahi.

³Dangka dingin lhit thengna bel, chule sana dingin lhummei akimangin; ahinla Pakaiyin vang lungsungho apatepjin ahi.

⁴Khanset bolpa chun jouthu jeng angaijin, chule mijouvin thil gilou ngaina dingin ana asunge.

⁵Koihile mivaicha daichavaija chun ama asempa i-asahlou ahin, chule midang vangsetna chunga kipahpa chu talen manlouva umlou helding ahi.

⁶Achate chate chu tehse hodinga lallukhuh ahin, chule achateu loupina chu apateu ahi.

⁷Mingolin thugiltah aseidohle akilompon; chusanga chu leng chapan jou aseiding chu kilommo cheh ahi.

⁸Kipamana kipe thil hi aneipa mitna songmantam tobang ahin, amachu akiheinalam tina akhangtouve.

⁹Suhkhel khukhumpa chun ngailutna ahol ahin; ahinla thilkhat velphoh jingpa chun golphatah jong asukhenjin ahi.

¹⁰Mingol khatnin jakhatvei jepna atosangin, miching khatnin khatvei kiphona chu na asajon ahi.

¹¹Mi gilouvin kiphinna ding jengbou aholin, hijeh-a chu mi engse thupole khat ama doudinga kisol ding ahi.

¹²Mingol khat angolpet tosangin, vompi anouho kilohpeh khat toh kimaito abaijon ahi.

¹³Koi hile apha chu ase-a lethuh chanchu, insunga kona ase kichoidoh louhel ding ahi.

¹⁴Kinah kipatnahi mikhatnin twi agah londohsah tobang ahin, hijeh chun kinahna asodoh masangin kinelna chu dalhan.

¹⁵Miphalouho themchan sah-a, chule midihtah ho themmo chansah-a chu anilhona Pakai dinga thet umtah ahi.

¹⁶Chihna-a alunglut lou mingol chun, ipikhoh-a chihna chohna dinga akhutna sum achoi dingham?

¹⁷Loile gol chun phat jousen angailun, sopi vang genthei nikho-a dinga peng ahi.

¹⁸Hetthem theina neiloupa chun akhut abengton, chule loile gol anga kitepna neija dingpa-in ahungpang jitai.

¹⁹Suhkhelna ngailupa chun kinahna adei ahin, chule akotpi choisanga chun manthah na ahol ahi.

²⁰Khangitlouna lung neipa chun thilpha amupon; chule joule nal seijingpa vang thilphalou va alhalut jitai.

²¹Mingol chu ahingpa din gimna ahin; chule mingolpa pa chun kipana aneipoi.

²²Lungsung kipana hi loule ai phatah abangin; ahinla lung gentheina vang hin gu le changho agotsah-in ahi.

²³Migilouvin thutanna lampiho heikoina dingin, guhthima thilpeh akilahjin ahi.

²⁴Hetkhenthem theina neipa masanga chihna aumin, ahinla mingolpa mit vang chun leiset mong gei ave lelen ahi.

²⁵Chapa ngolchu apa dinga gimna ahin, chule anu dinga hesohna bep ahi.

²⁶Chujongle midih gotna peh-a, ahiloule thu adih-a tanjeh-a pipuiho jepna kipe jongchu dihlou ahi.

²⁷Hetna neipa chun ngaikham tah-in thu aseijin; chule hetkhenthem theina neija michu milungchingtah ahi.

²⁸Mingol jengjong thipbeh-a aum tengleh michinga sim ahin; chule akam kihup pa chu hetkhenthem theina neimi ahi tin akive sange.