Read Thado Chin Thuchihbu 18 Bible Online

Thuchihbu 18 - Thado Chin bible

Thuchihbu 18

¹Mipi lah-a kon kikangse mihem chun, ama phatchomna ding maimai bou aholin, thudih jouse douvin apangin ahi.

²Mingol chun chihna le hetna-a kipana aneipon, hinlah ama lunggel jengbou phondoh ding adeije.

³Migilou ahungtengle i-sah louna jong ahung jin, chuleh minsetna ahungteng jum na ahungjin ahi.

⁴Mihem khat kamsunga kon thupot chu twithuh tahho tobang ahin, chihna twinah jonghi vadung longjing tobang ahi.

⁵Thutanna munna migiloupa panpi-a, chuleh michondih pa themmo chansah jongchu phaloutah ahi.

⁶Mingol thusei chun kinelna asosahjin, chule akamsungin ama kijepnading akiseidoh ji-e.

⁷Mingol kamsungsoh chu amadinga manthah na ahin, chule athusei chu ahinkho kisuh mangna dinga thang ahi.

⁸Guhthima kisei thucheng chu nehle chah tuitah tobang ahin, chule oisunggil lampeh a alutjin ahi.

⁹Anatoh na-a thasepa chu, ijakai susepa toh sopi khat ahi.

¹⁰Pakai minchu insang dettah ahin, hia chun michonpha te alhailut alhailutnun ahoijuve.

¹¹Mihaopa dinga anei agouchu akhopi dettah tobang ahin, chule akiletsahpi tah kulpi sangtah tobang ahi.

¹²Suhmangna masanga chun mihem lungthima hoithona aumin, chule jana masanga kineosahna aumin ahi.

¹³Thu angailhah masanga donbut jengpa chu, amadinga ngolna leh jachatna ahi.

¹⁴Mihem lhagao chun mihem adammo na-a kon adamsah jou ahin, ahinlah koiham lhagao damlouna thohjou dinga?

¹⁵Milung chingin hetkhena akimudoh-in, chule miching nakhangin hetna aholin ahi.

¹⁶Mihem khat chu athilpeh-in ama dingin mun asem peh-in; chule amachu milen, milal ho masanga ahin puilut jin ahi.

¹⁷Ama chungthu kisei masatpa chu adihtah danin akilangin; ahinla aheng akom chu ahungin ama ahung kholchiljin ahi.

¹⁸Vang san nahin kinelnaho asuthipmin, chule mithahat te jong asukhenin ahi.

¹⁹Sopi kisunohsa jollut kitna chu khopi dettah lahsangin ahahsajon; chule amaho kibaona chu kulpi pal kigenho bangjeng ahi.

²⁰Mihem chu akamsung soh jala oiva setna umding, athusei phatchomna jala ama vaset ding ahi.

²¹Leigui hin thina le hinna thahatna aneijin, chule chuche ngailuho chun aga akineh dingu ahi.

²²Koihile jinu kimu-a chun thilpha akimu ahin; chule Pakai khohsahna chu changa ahitai.

²³Mivaichan taona jeng amangchan, ahinla mihaovin vang hoithotah-in adonbutnin ahi.

²⁴Golle pai tamtah nei mikhat chu amajong agolho dinga golphatah hiding, hinla sopi tah sanga ikinaipi goljong aumin ahi.