Read Thado Chin Thuchihbu 19 Bible Online

Thuchihbu 19 - Thado Chin bible

Thuchihbu 19

¹Genthei jongle kitah tah-a hinkho mangpa chu, thugilou seija mingolpa sangin aphajon ahi.

²Hetna beija umhi aphapon, chule chonset na-a kaljangpa jongchu aphadeh pon ahi.

³Mihem angolna chun alampi aheimangpeh-in, chule alungthim sunga Pakai adouvin ahi.

⁴Neile gouvin loile gol tampi asemdoh-in, ahinla vaichapa chu aheng akom jengin jong adalha jitai.

⁵Hettohsah lhem chu talen manlouva umlou ding ahin, chule jou le nala thusei jongchu hoidoh louhel ding ahi.

⁶Pipuiho khohsahna chu mitam tah-in angeh dingu ahin, chule thilpepa din mitin chu agol apai ahijitai.

⁷Mivaicha chu asopite jousen jong ahot boluvin, agolho chu ama-a konin iti agamlat tadiuvem? Aman amaho chu ngehna le taona pumin anung delpeh-in, hinlah amahon adon tapouve.

⁸Chihna kimudohpa chun ahinna angailut ahin, hetkhen themtheina kichin pachun thilpha amuteiding ahi.

⁹Hettohsah lhem chu talen manlouva umlou helding, chule jouthu seipa chu mangthah teiding ahi.

¹⁰Nomsa tah-a hinkho mandinghi mingol dingin akilompon, soh khatnin pipuiho chunga vai ahomding jong akilompoi.

¹¹Mihem lunggel themnan alunghana asudamin, chuleh ama douna-a thil kibol angaidam jouchu aloupina ahi.

¹²Lengpa lungsatna chu keipi kitum tobang ahin; ama mikhohsahna vang chu hampa chunga daitwi lha tobang ahi.

¹³Chapa ngol chu apadinga hamsetna ahin; chule kinel kalna dimset inneipi chu tanglouva vajing gotwi tobang ahi.

¹⁴Inle lou, chule neile gou jouse hi pate-a kon kilason gou chu ahin, chule numei ji phatah vanghi Pakaiya kon ahi

¹⁵Thasetna hin mihem a-imut lhuhsah-in; chule mi thase chun kel athoh ding mong ahi.

¹⁶Thupeh nitpa chun ahinkho akichintup ahin, ahinla alamjot na-a chingtheilou chu thitei ding ahi.

¹⁷Mivaicha chunga khotona neipa chun Pakai apeh ahin; chule aman anapehdohsah chu alepeh kitding ahi.

¹⁸Kinepna aumpetnin nachapa bolgimin, chule suhmanga aumding jong gel hih-in.

¹⁹Milungchomin talen amat teiding ahi; ajehchu nangman ama huhdoh jengle chun avela abolkit teiding ahi.

²⁰Khonunga nachih theina dingin, hilthemnale hilchahna hi ngaijin lang kisanin.

²¹Mihem lungsunga thilgon tampi aumin, ahijeng vangin Pakai thilgon leh phatsah bouchu kiphutdet ding ahi.

²²Mihem khatnin angaichat chu lungsetna chan hi ahin, chule joule nal sei mihem hisangin mivaicha hiding aphajoi.

²³Pakai ginna-in hinna-a apuilutnin, chuche Pakai ging mi chu lunglhai ding ahin, thilsen alhunkhum louhel ding ahi.

²⁴Mithasen akhutnin abukong asohlut jin, akam sung geija hin dop ding jong angapcha poi.

²⁵Mitaitompa akijepleh, mimolpan chih theinan aneijin, chule hetkhenthem theina neipa chu phohsal lechun hetna-a khangtou ding ahi.

²⁶Apa lamlouva engbola chule anu delmanga chu jum nale jachatna hinpolut chapa chu ahi.

²⁷Kachapa, hetkhen themna-a kon nachekhelsah thumop ho chu ngaita hih hellin.

²⁸Pathen jalou hettohsahpan thutanlhahna dihtah chu ataitomin, chule migilou kamsungin khangitlouna chu avalhume.

²⁹Gotna hohi mitaitom ho dinga kisem ahin; chule kijepnahohi mingol ho tungtuna ding ahi.