Read Thado Chin Thuchihbu 2 Bible Online

Thuchihbu 2 - Thado Chin bible

Thuchihbu 2

¹Kachapa, nangman kathuseiho nakisana, chule kathupeh ho nakichin tupma ahile;

²Chutia chu chihna lama nanakhang nasun geh-a, hetkhenthem theina lama nalung naman chah-a;

³Chule nangman hetna ding gunchu tah-a nahola, hetkhenthem theina dinga aw thong jena nasapma;

⁴Nangman amanu chu dangka banga nahola, chule gou kiselu banga nakhol chila ahileh;

⁵Chuteng nangman Pakai gin kitihi nahet khending; chule Pathen hetna hi nakimudoh teiding ahi.

⁶Ajehchu Pakaiyin chihna apen, akam sunga konin hetna leh hetkhenthem theina asodoh-in ahi.

⁷Aman michonpha ho dingin chihna phatah akoipeh-in; dihtah-a chonteho dingin ama chu lumdal'in apangin ahi.

⁸Aman thu adih-a kitana lampiho chu aching tupmin, chule amithengte lampi chu aveng tupmin ahi.

⁹Chuteng nangman chonphatna, thutandih, thildih, chule lampipha ho jouse hethem tan nate.

¹⁰Chihna nalung sunga alutna, chule hetna chu nahinna-a dinga kipana ahunghi tengle;

¹¹Chihtheina chun nangma nahoitup ding, hetkhenthem theinan nangma naventup ding ahi.

¹²Hichun migiloupa lampia konle, jouthu thilho seipa akon;

¹³Milungdih lampiho peldoh-a, muthim lampiho joh-a chepa-a kon;

¹⁴Thilse bolna-a kipah-a, chule khangitlouna le engsetna-a thanom ho-a kon;

¹⁵Alampihou koile-a, chuleh alampi houva vahlon leho-a kona, huhdoh-a naum ding ahi.

¹⁶Nangma numei phalounu-a konle, numei phalou akama pachat lhem seinu-a kon;

¹⁷Akhan donlaija apuihoipa dalha-a, chule Pathen toh akitepna sumildelnu a kona huhdoh-a naum ding ahi.

¹⁸Ajehchu amanu in chun thina lama apuijin, chule lampi chun thina alhutnin ahi.

¹⁹Amanu koma lutapou chu koima ahung kinungle pon, amahon hinna lampiho jong chu atuhdet pouve.

²⁰Chutia chu nangman miphaho lampi najot theiding, chule michonpha te lampiho nakichin tup thei ding ahi.

²¹Ajehchu milungdih chu gamsunga chengintin, chule michamkim chu chua chengden ding ahi.

²²Ahin migilouho vangchu leisetna kona suhgama umding, chule suhkhel neiho chu chua kona kaldoh-a umding ahiuve.