Read Thado Chin Thuchihbu 20 Bible Online

Thuchihbu 20 - Thado Chin bible

Thuchihbu 20

¹Ju hi midai chavai ahin, chule akidontho khamnathei jong kinahna ahibouve. Hicheho kipui mangsah chu miching ahipoi.

²Lengpa lungsatna hi keipi kitum tobang ahin; koihile ama lunghan sah-a chu amatah hinkho achanlo teiding ahi.

³Mihem khat dinga kinahna-a kon akikangse thei chu, ja achan na ahin; ahinla angol tapouvin kinahna asosah theije.

⁴Thasepan daplai ahijeh-in lou alhoupon, hijeh-a chu chang at tengle aman khut adolea imacha neilouva umding ahije.

⁵Mihem lungsunga um hilthem theina hi twi thuhtah tobang ahin; ahinla hetkhentheina neipan akithaldoh ding ahi.

⁶Mitam tah-in ama changseh phatna aphongjal len, ahinla mi kitah tah chu kon amu jouding ham?

⁷Midih chu ama kitahna-a achon lejin, ama nunga achate jong phat theina achanguve.

⁸Thutanna laltouna a tou lengpan amit tenin thil gilou jouse chu athecheh-in ahi.

⁹Koiham kalungsung kakisop thengtan, kachonsetna-a konin kathengtai, tia aseithei ding?

¹⁰Thilgih kibanglou leh thilgih tena dihlou chu, kibangtah-a Pakai dinga thet umtah ahi.

¹¹Chapang khat jengjong anatohchu atheng ham, adih ham, athilbola konin akihekhen jenge.

¹²Khojah theina kol leh, khomutheina mit jengjong, ania Pakaiyin asem cheh ahi.

¹³Imut dingjeng ngailu hih-in, vaichatlo getnin nate, namitteni hasah jingin,chutile changlhah-a naneija, nalunglhai ding ahi.

¹⁴Thilchopan hichehi apanna aumpoi, hichehi apanna ding aumpoi, tin aseijin, ahin achedoh tengle vang akithang-at jie.

¹⁵Sana aumin chule songmantam tampi aumnai, ahinla hetna hungsodohna kam vangchu songmantam lutah khat ahi.

¹⁶Gamdang mikhat dinga kitepna thilla kitungpa ponsil chu lahpeh un; chule gamdang numeinu khat dingin kitepna thilin mangun.

¹⁷Mihem khat dingin lamdih louva kimu changlhah hi atuijin; ahinla chomkhat joutengle akamsunga chu songbong dimding ahi.

¹⁸Thilgon tapouhi thumopna in aphudoh ahin; chule kihilna phatah in gal asat ahibouve.

¹⁹Guhthimthu seija vahlelepa chun thu ki imho aphongdoh jin; hijeh chun akama thuphalou seile hotoh kitimat hihbeh in.

²⁰Koihile apa ahiloule anu samse-a chu; ameivah muthim lah-a kisuhmit pehding ahi.

²¹Neile gou chu abul lang gangtah-a gahlothei ahinai; ahinla akichaina chu phattheibohna hilouhel ding ahi.

²²Keiman setna chu kalethuh teiding ahi, tin seihih beh in; amavang Pakai chu ngah-in, aman nangma nahuhdoh teiding ahi.

²³Thilgih dihlou chu Pakai dinga thet umtah ahin; chule thilgih tena dihlou jongchu thilpha ahipoi.

²⁴Mihem chenahohi Pakaiya kon ahin, achutile mihemin ama lampi iti akihet khenthei ding ham?

²⁵Kinotah-a thilkhat chu atheng ahi tia, chule kitepna ineijouva nungkhol kitding kiti hi mihem dinga kipal lhuhna thangkol ahibouve.

²⁶Leng chingtah chun migilouho athe cheh-in, chule achunguva changvohna kanglum chu atangjin ahi.

²⁷Mihem lhagao chu Pakai meivah ahin, hichun mihem lungsung jouse akhol chilsoh ji-e.

²⁸Hepinale thutah-in lengpa chu achingtup jingin, chule ngailutna-in alaltouna chu achoisang jinge.

²⁹Khangdongte loupina chu athahatnao hi ahin; chule tehse ho melhoina chu asam kannu hi ahi.

³⁰Thoh hahsatah kijepnan agilou chu asopthengjin; hibang chun kijepna-in sunggil laiho jouse asuthengin ahi.