Read Thado Chin Thuchihbu 21 Bible Online

Thuchihbu 21 - Thado Chin bible

Thuchihbu 21

¹Lengpa lungsung chu Pakai khutna um ahin, twi lonna vadungho bangin aman agot nalam lama aheijin ahi.

²Mihem khat mitmun ama lampi tapouchu adih-in amun, ahinla Pakaiyin lungsungho joh akholchil jin ahi.

³Dihtah-a thil kibole, dihtah-a thutan nahi, kilhaina sanga Pakaiya dinga santhei joh ahi.

⁴Eima chang kivetsangna leh kiletsahna lungsung, chule migilou chalohna jousen chonset aboldoh jin ahi.

⁵Gunchupa lunggel ho chun ninglhin namun alhunsah-in, ahinla kikinsah tapou chu lhasam dingbou ahi.

⁶Joule nala kimu neile gou chu thina holho dinga pannabei suhle tunga lengle ahibouve.

⁷Migilou ten aguhdoh-u thil hochun amaho asuhmang teiding ahi; ajeh chu amahon thudih ajuinom pouve

⁸Chonsepa lampi chu alam jangpon, hinlah chonphapa natoh vang adihjeng ahi.

⁹Inn lentah sunga numei nelhat khatto chenkhom sangin, in chung ningkoi khatna chen joh aphajoi.

¹⁰Migilou lunggel chun thilse adeijin, aheng akomin ama mitna khohsahna amujoupoi.

¹¹Mitaitompa gimbolna akipeh tengle milhamin chihtheina aneilo jin; chule miching chu akihil teng aman hetna akimujin ahi.

¹²Michonpha pan agiloute insung chu alungthima chingthei tah-in angaitojin; hinla Pathen'in agiloutechu agitlounau jal-in alehkhup jitai.

¹³Koi hijongle vaichate kapetna akol kisipma chu, amajong hungkap mintin hinla kijahpeh talou ding ahi.

¹⁴Aguh-a thil kipe hin lunghanna adailhah sah-in; chule pon noija nehguh kipe hin lungsatna nasatah asudaijin ahi.

¹⁵Thu dihtah-a tanding hi midihte kipana ahin, Hinlah thilgilou bolte chunga manthah na hung lhungding ahi.

¹⁶Hetthem theina lampia kona vahmangpa chu, athiho kikhop khom nalah-a umding ahi.

¹⁷Nopsahna ngailu-a chu vaicha teiding ahin, koihile jule thaova lop chu haosa louhel ding ahi.

¹⁸Migiloute chu michonpha te dinga kilhatdohna-a pangdiu, chule mikitahloute jong mikitahte lhatdoh na-a pangdiu ahi.

¹⁹Numei nelhat jingle lunghang jingtoh chenkhom sangin, gamthipma chending aphajoi.

²⁰Michingtah chenna in'a chun deichatthei neile gou, chule thao aumin, ahin mingolin vang akisuhmang joujitai.

²¹Koi hile chonphatna le hepina juija chun hinna, chonchan phatna chule jana akimudoh-in ahi.

²²Miching chun mithahat ho khopi jong atedoh jouvin, chule amahon akisonpiu athahatnao jousejong asuchim jouvin ahi.

²³Koi hile akamle alei kitimthem chun, alhagao lungjinna-a kona akivenbit ahi.

²⁴Kiletsah tah-a lunghangpa minchu kiletsah leh taitomhat ahi.

²⁵Mithase chu angaichat nan athatjitan ahi, ajehchu akhutnin na atonggim nompoi.

²⁶Nilhum keijin aman neipap leh kiloset abolin, ahinla chonpha pan vang apedoh in khen ima aneipoi.

²⁷Khangitloute kilhaina chu thet umtah ahin, aman lungthim phalou puma ahinchoi teng iti thet umcheh ding hitam?

²⁸Hettohsah lhem-a pang michu mangthai teiding ahin, hinla thukisei ngaithempan vang tanlouhela thu aseiding ahi.

²⁹Migiloupa chu akimoh hansan sah-in, hinla mi kitahpa vangin alampi akigeltoh jingin ahi.

³⁰Chihna hihen, hetkhen themna hihen, thumopthemna hijongle Pakai douthei dinga aumpoi.

³¹Sakol chu gal kisat nikho-a dinga gotsa ahitan, hinla galjona chu Pakaiya kon bou ahi.