Read Thado Chin Thuchihbu 22 Bible Online

Thuchihbu 22 - Thado Chin bible

Thuchihbu 22

¹Minphatna hi haona tamtah ho sanga kilhending aphajon, chule ngailutna a kikhohsah nahi dangkale sana sanga kilhenjoh ding ahi.

²Ahaole avai aumkhomin, abonuva sempa chu Pakai ahi.

³Milung chingin thilse hunglhung ding chu amu masan, hijeh chun akiselin, ahinla mimolhochu achepaijun talen amanjitaove.

⁴Kineosahnale Pakai ginna-a chun haona, jana chule hinna aumin ahi.

⁵Khanggilouho lampia chun lingle thang aumin, ahinkho kichintuppa vang hicheho-a kona chu gamlading ahi.

⁶Chapang chu achena dingdol lampia khoukhah-in; chutile ama ateh teng jongle hia kona chun kiheimang taponte.

⁷Mihaovin mivaicha chunga vai ahomin, chule abatpa chu abatsahpa soh-in apangin ahi.

⁸Khangitlouna tupa chun ahomkeo aki at ding ahin, chule alunghana mol chu thon ding ahije.

⁹Mihongphal chu phatthei kiboh teiding ahi; ajehchu aman achanglhah jengjong vaichate din apedoh jin ahi.

¹⁰Mitaitompa chu deldoh un chutile kinelna beitante; henge, kinahnale kihousetna jong tang tante.

¹¹Lungthenna ngailupa chu akamdam jeh-a lengpa gol hiding ahi.

¹²Pakai mit tenin hetna avetupmin, chule aman suhkhelna neipa thusei ho chu alehkhup helin ahi.

¹³Mithasepa chun, polama keipibahkai aumin, lampi kahlah ho-a keima eithat ninte, tin aseije.

¹⁴Hetkhahlou numei ho kamsung chu kotong thuhtah ahin, Pakai hotna umpa chu chua chu lhalutding ahi.

¹⁵Chapang khat lungsunga chun ngolna aumin, ahinla sudihna molchun ama-a kona gamlatah-a anomang ding ahi.

¹⁶Ahaonaho puntheina dinga vaichaho joulhepma, mihaoho pehbepa vangchu thonlouva lhasam teiding ahi.

¹⁷Nanakhang hinsungin lang miching thuseihohi ngaijin, chule keima hetna lama nalungthim hinmang chan.

¹⁸Ajehchu nangman nasunga hicheho chu nakichin tupma ahile, lunglhaina ahin, hicheho chu nakama jong naseiding ahi.

¹⁹Pakaiya natahsana aumtheina dinga, tuni nikho-a keiman nangmatah henga hetsahna kabol ahitai.

²⁰Hetna thu hihen thumop phatah hijongle, thilpha chungnung chu keiman nahenga kahinsut hitalou ham?

²¹Thudihho chu thutahbeh mong ahi nangma kahetchetsah nadingle nahenga hungkisol ho henga thutah hochu nadonbut theina dinga keiman nahenga kahinsut hitalou ham?

²²Mivaichaho chu chomhih-un, ajehchu ama mivaicha ahi; kotpi phunga jong gentheiho chu bolgim hih-in.

²³Ajehchu Pakaiyin amahothu chu aseitohpeh-a, chule vaichaho chomho hinna chu aman achom ding ahi.

²⁴Milung hang jingtoh kigolcha hih-in; chule milungkhoh toh nangma chekhom hih in.

²⁵Achuti loule nangman ama lampiho hekhan natin, chule nahinkho-a din thang hikhante.

²⁶Kitepna chunga khut lhaho lah-a nangma khat nin jong pang hih-in, ahiloule sum kibat jeh-a midinpeh ho lah-a jong pang hih-in.

²⁷Nangman pehding imacha naneilou ahitahle ipi dinga aman nalupna jalkhun chu alahmang dingham?

²⁸Gollui laija napu napateu vin anatun dohsao, gamgi chu chon mang hih-un.

²⁹Atohna lama gunchu mi namu em? amachu lengho anga dingtei ding, mi maimai anga dinglou helding ahi.