Read Thado Chin Thuchihbu 23 Bible Online

Thuchihbu 23 - Thado Chin bible

Thuchihbu 23

¹Nangma thunei vaihomho khat toh an nedinga natoutengle, na anga ipi ummam ti phatechan gellin.

²Chule an dutah mi nahile nalol la chemcha kidojingin.

³A-anneh tuitahho chu ducha hih-in, ajehchu hicheho chu kilheplhahna an ahibouve.

⁴Haoding tupnan kisulung gimval hih-in, nangma chang kichihsah hih-in.

⁵Nangman aumlou thil chu namit teni-a navet dingham? Ajehchu thonlouvin haona hohin lhaving akisemun, van lama muvanlai bangin alengmangji taove.

⁶Michip pa changlhah chu nangman nehih beh-in; ama antuiho jong ducha hih-in.

⁷Ajehchu amachu alunga agel bangbang hija ahin; nenlang donin tin nahenga aseijin, ahinla alungthim chu nangma toh aumkhom pon ahi.

⁸Nangman nanehsa anchu nalohdoh ding; chule thu ngeitah naseiho jong pannabei hiding ahi.

⁹Mingol nakhanga imacha seihih beh-in, ajehchu chihna thu naseiho jong i-sah louva akoiding ahi.

¹⁰Gollui laija gamgi lui melchihna ho chu ladoh hih-in, chule pabei ho gamsunga jong lutdan.

¹¹Ajehchu amaho lhatdohpa chu thaneitah ahin, aman athuchu nahenga aseitoh ding ahi.

¹²Hilchahna lama nalungsung mangchan lang; chule nanakhang teni chu hetna thu lama mangchan.

¹³Chapang kisuhdih nahi tuhtang hih-in, ajehchu nangman ama molin jep jongle chun thiponte.

¹⁴Nangman ama mola najepding, chutile ama lhagao thikhol khul'a kona nahuhdoh johding ahi.

¹⁵Kachapa nalung achih-a ahile, kalung kipahlheh ding ahi.

¹⁶Henge, nangman nakama thil dihho naseidoh tengle, kalung gilla kakipa ding ahi.

¹⁷Nalungin michonseho thangse hih-in, ahinla nangman nilhumkeijin Pakai chu gingin.

¹⁸Ajehchu tahbeh a akichaina khat uma ahin, chule nakinepna chu kisei tanlou ding ahi.

¹⁹Kachapa nangman ngaijin lang chihnan neijin, chule hiche lampia chun nalung puihoijin.

²⁰Judon hole saneh hat ho lah-a nangma lhahih in.

²¹Ajehchu jukhamho leh milopho chu vaicha teiding; chule imutsona chun mipa chu ponse avonpeh ding ahije.

²²Nahinga napa thu kingai jinlang, nanu ateh phatteng jongle nahsahmon bolhih-in.

²³Thutah chu kichoh-in, chule chihna, hilchahna hetkhen themtheina, jong kichoh inlang johdoh tahih-in.

²⁴Michonpha chu apa hapah-in kipah intin; chule chapang ching hingpa chun amajalla kipana aneiding ahi.

²⁵Nanu leh napa kipah inte, chule nahinga nanu chu kipah thanom ding ahi.

²⁶Kachapa nalungthim neipen, chule namitnin kalampiho vetupmin.

²⁷Ajehchu notinu chu kokhuh thuhtah tobang ahin; chule hetlou numeinu chu kokhuhjim ahi.

²⁸Amanun jong gucha michom bangin mi achanglhin; chule mihem ho lah-a chun suhkhel neiho apunsah-in ahi.

²⁹Koiham dana nei? Koiham gimna nei? Koiham kinahna nei? Koiham kiphina-a nei? Koiham ajehbeija tina maha pu-a? Koiham mit san dehduh neija?

³⁰Amaho chu juphola khongaisotna ju kihalna hola vahle ho chu ahiuve.

³¹Ju chu asanphat laitah vetdan, khonjong asansah-a achama naljella alonlhah jongle nangman vehih-in.

³²Akhonnale hichun gul bangle gulsum gu hattah bangin achujin ahi.

³³Namit tenin hetkhahlou numei ho avetna, chule nalunggilla jong thildihlou jeng nagelding ahi.

³⁴Nangma twipi lailunga lumpa nabahding, ahiloule kongsunga kitungdoh khom sangtah leh-a lumpa nabah ding ahi.

³⁵Amahon eivouvin ahinla keima kanapoi; amahon eidengun ahinla kahephapoi; itihle kei kakhangdoh tadem? Kaholbekit nahlaiding ahi, tia naseiding ahi.