Read Thado Chin Thuchihbu 24 Bible Online

Thuchihbu 24 - Thado Chin bible

Thuchihbu 24

¹Migilouho chu thangset hih-in, amahotoh umkhom ding jong ngaicha hihbeh-in.

²Ajehchu amaho lungsungin manthah na lamjeng agelin; chule akam sungun aphalou aseijuve.

³Chihna vangin in akisahdoh-in, chule hetkhenthem theina jal-in akiphutdetne.

⁴Chule hetna jala indanho chu manlutah thil le lo, chule lungdei umtah neile gou dimsetna ahi.

⁵Miching chu atha ahatnin; henge, hetna neipa thahatna chu khangtou ding ahi.

⁶Ajehchu chihna puma thumopthemna vanga nangman gal nasatding ahin, thumopthem ho tamna lah-a hoidohna aume.

⁷Mingol dingin chih gilnahi asang behsetnin, aman kotpi phunga akam akehpoi.

⁸Thilse bolding gongdohpa chu, miphaloupa kitiding ahi.

⁹Lunga ngolhoi thu geljing hi chonset ahin, chule mitaitompa chu miho dingin thet umtah ahi.

¹⁰Kidouna nikho-a nalung alhah-a ahile, natha chu lhoma ahi.

¹¹Nangman thina lam jonna kijot hole, akithat dinga gotsa umteho huhdohna dinga pohnatna nanei louva;

¹²Nangman, keihon kanahepha pouve nati vangle, ven, ama milungsung vetuppa chun hichu agelkhoh louding ham? chule nahinkho hoituppa chun ahetlou dingham? chule aman mijouse chu anatoh dungjuija lethuhna apehlou ding ham?

¹³Kachapa khoiju chu ne-in, ajeh chu tuitah ahi, chule khoiju phang jongchu ne-in, nakam sung dinga lhumtah ahi.

¹⁴Chihna le hetna jong chu nalhagao dinga khoiju tuitah tobang ahin, nangman hichu nakimudoh teng kipaman nasanding, chule nakinepna jong thon louding ahi.

¹⁵Vo migiloupa, michonpha chenna mun dounan changlhi hih-in, akicholngahna munchu suse hih in.

¹⁶Midihtah pa chu sagivei lhu jongle athoudohkit jin, ahinla migilou vangchu setna-a lhalut teiding ahi.

¹⁷Namelmapa alhuhteng nangma kipah hih-in, chule ama akipal lhuh tahjongle nalung kipasah hih-in.

¹⁸Achuti loule Pakaiyin hichu muntin, hichun ama alung hansah-a, chule ama-a kona alunghana aheimang louding ahi.

¹⁹Thil gilou bolte jeh-in nangma lungkham hih-in, migiloute umchan jong thangse hih-in.

²⁰Ajehchu thil gilou bolpa dinga kipaman umlou helding, chule migiloupa meivah chu kisumit ding ahi.

²¹Kachapa Pakai le lengpa chu gingin, chule vaihom gilouho lah-a jong kikumlut hih-in.

²²Ajehchu amaho chunga hamsetna photlot louva hungsoh ding ahin, amani manthah na hinlhut ding chu kon ija ahet em?

²³Hiche thilho jonghi miching ho-a ahi. Thutan na-a sihnei langnei bolding apha poi.

²⁴Migiloupa jah-a, nangma michonpha nahi tia seipa chu, amachu mipin asapset ding, namtinin ahotbol dingu ahi.

²⁵Ahinla migilou phohsalho chunga chu kipana umtei ding, chule phattheina chu achunguva chuding ahi.

²⁶Dihtah-a donbutna pepa chu mijousen abengchop ding ahi.

²⁷Polama nanatoh ding gotsan koijin, chule naloulaija nanatohna ding jong kigottup masatnin, chujou tengle na in kisah-in.

²⁸Ajeh beijin naheng nakom dounan hettoh sah-in panghih-in, chule nakamin koima lhemlha hih-in.

²⁹Aman eibolna bangin keiman ama bolinge tin seihih-in, anatoh dungjuijin keiman lethuh inge tin seihih-in.

³⁰Keiman mithasepa loumun leh, hetthem theina neiloupa lengpilei chu kagah jotpan:

³¹Chule ven, apumpin lingle khaovin adipsohtai, chule sachih-in apheng alhangin akhujeng tan, chule songtho kisejong achimlha joutai.

³²Chuin keiman hichu kamu phatnin, phatechan kagelin, hiche kavetna-a konchun hilchahna kachangin ahi.

³³ Chom chakhat imutna, chom chakhat lulhuh-a, chom chakhat khut gahlhepto-a imut;

³⁴Hitobanga chu kholjinpa banga vaichat nan nangma nahin lhunkhum ding, galmanchah choipa banga gentheinan nahin phah ding ahi.