Read Thado Chin Thuchihbu 25 Bible Online

Thuchihbu 25 - Thado Chin bible

Thuchihbu 25

¹Hicheho jonghi Solomon thuchihho; Judah lengpa Hezekiah mitehon anasutdoh-u chu ahi.

²Pathen'in thilkhat aselguh hi ama loupina ahin; ahinla thilkhat holdohhi lengho ja achan nao ahije.

³Van asan bangle leiset athuh banga hi, lengho lungsung jong holdoh hoi ahipoi.

⁴Dangka-a konin a-eh ladohle chun, thih khengpa dinga bel hung sohdoh ding ahi.

⁵Lengpa angsunga konin mikhang gilou chu puidoh lechun, alaltouna chu chonphatna-a kiphutdet ding ahi.

⁶ Lengpa angsunga nang le nang gavahlut hih-in, chule milen milal ho umna mun'a gading hihbeh-in.

⁷Ajehchu namitna namu lengchate masanga suhnema naum sanga, hilama hungtouvin tia nahin kou diuchu nang dinga phajo ahi.

⁸Kinah nadinga kino tah-in che hih-in, ijemtin naheng nakomin najumso khale, achainale nangma jong bolding helouvin umkhaget in nate.

⁹Nachung chang thuchu na inhengpa toh seikhom lhonin, chule midang henga thuguh himhim seidoh hih-in.

¹⁰Achutiloule hiche thuguh hedoh chanchun nahin jumson tin, chule naminsetna chu mang talouhel ding ahi.

¹¹Thu dihtah-a kisei hi dangka kigol lah-a sanatum tobang ahi.

¹²Thu kisei ngaipa dinga kiphona dihtah hi, sana bilba le sanathenga kisem kijepna tobang ahi.

¹³Tahsan umtah thupole-a mihem chu, asolpa dinga chang at laija buhbang dapjen tobang ahi; ajehchu aman alamkaite hinna asunou vin ahi.

¹⁴Koi hile thilpeh dihlou kithang atpi-a michu, meibol jingleiloi le hui nunga go julou tobang ahi.

¹⁵Thohhat na-in vaihom khat ajol lhajouvin, chule awnema thu kiseihin gule chang jong asubong theijin ahi.

¹⁶Nangman khoiju namu em? naneh jou khambep ne-in; achutiloule vavalin natin lodoh khagetnin nate.

¹⁷Naheng nakom insung hachot lut behseh hih-in, injole natheichim valintin, nahotlo khante.

¹⁸Aheng akom douna-a hettohsah lhem-a pangpa chu, moltum lentan, chemjam chule thalchang hemtah tobang ahi.

¹⁹Lungjinpetna kitahna neilou mikhat chunga kinep hi, habongle kenggu kipel tobang ahi.

²⁰Lunggim gentheija umkhat henga la sapa chu; daplaitah-a mi ponsil lahmang pehpa tobangle, lengpitwi thuhtah kisuhkhahna maha chunga kisunglha tobang ahi.

²¹ Namelma chu agil akela ahile nehding penlang, adang achahle donding twi pe-in;

²²Chutia chu nabola ahile nangman ama lujanga mei-am nasunlhah peh hiding ahin, Pakaiyin nangma tohphat man napeh teiding ahi.

²³Sahlam huijin go asem mangin, hitobang chun kiseisetna hin lunghanna maiso asodohsah-e.

²⁴Numei hansetah toh inlen khatna chenkhom sangin, in chung ningkoija chending aphajoi.

²⁵Gamlatah-a kona thupha hunglhung hi, adangchahpa dinga donding twidap tobang ahi.

²⁶Migilou angsunga michonpha abohkhup dinghi, twinah phalou le twinen putna twisam tobang ahi.

²⁷Khoiju tampi neh aphatlou bangin, mihem hon amachang loupina akiholu jonghi aphapon ahi.

²⁸Amatah lhagao thunun jouloupa chu, khopi chimlhasa le kulpi umlou tobang ahibouve.