Read Thado Chin Thuchihbu 26 Bible Online

Thuchihbu 26 - Thado Chin bible

Thuchihbu 26

¹Nipilaija buhbang alhah bangle, chang-at laitah-a go ajuh bangin, jana hi mingol dingin akilompoi.

²Vacha lengle le pelpa lengle bangin, ajehbeija kisapsetna jong atang deh poi.

³Sakol dinga jepna, sangan dinga kamdal, chule mingol tungtun dinga mol uma ahi.

⁴Mingolpa chu angol dungjuijin donbut hih-in, amatoh bang khagetnin nate.

⁵Mingol chu ama mitmu-a akichihsah louna dingin, angol dungjuijin donbutnin.

⁶Mingol khat khutna thuthotpa chun, amatah keng akitanboh-a chule setna twi adon tobang ahi.

⁷Kengbaipa keng tenichu akibang ngaipon, mingol ho kamsunga kon kisei thulem jong chutobang chu ahi.

⁸Mingol jana pepa chu, ahsongse-a songchang khitpa tobang ahi.

⁹Mingol ho kamsunga kon hungpot thulem chu, ling hemjet khatnin jukham khat akhut adotlut tobang ahibouve.

¹⁰Thiljouse sema Pathen loupitah chun, mingol hole chonkhelte tohman apecheh-e.

¹¹Uichan aloh lhahsa anehkit ji bangin, mingol jong angolna-a akile kitjin ahi.

¹²Mihem ama mitmu-a kichang chihsah namu khah em? hichepa sangchun mingolpa din kinepna aumjoi.

¹³Mithasepan, lampia keipi bahkai aumin, khopi lamlen ho-a keipi bahkai aume, ati.

¹⁴Kotkhah chu akikam na-a akiheilele bangin, mithase chu ajalkhuna akiheilelejin ahi.

¹⁵Mithasen akhutnin abukong asohlut jin, akam sung geija hin dop ding jong angapcha poi.

¹⁶Thil hethem le lunggel them mi sagi sanga, mithase chu ama mitmu-a chingjo-a kigel ahi.

¹⁷Akikumna ding jong hilouva kikumma kinahna-a jaopa chu; uicha abila manpa tobang bep ahi.

¹⁸Milung chavai thingkho-am, thalchang, chule thina, seplele pa chu,

¹⁹aheng akom lhemlha-a, chule katot ahibouve, tia mitobang ahi.

²⁰Thing umlouna-a mei amitji bangin, misuto umlouna-a kidouna atangji tai.

²¹Songmeihol-am min songmeihol akahvam bangle, meijin thing akahvan ji banga; minelkal hatpa chu kinahna sosah-a pang ahi.

²²Misuto hat thusei ho chu tina maha tobang ahin; oisunggil lampeh-a jong hiche hochu alutjin ahi.

²³Muhnaljetle lungsung gilouchu, leibel dangka-a kitomjol tobang ahi.

²⁴Koi hile mihotbola chun akamin aseithem jin, hinlah alungsunga lheplhahna ngen akikhol khom ahin;

²⁵Aman damheocha thu aseidohteng, tahsan hih-in, ajehchu alungsunga thet umtah thil sagi aumin ahi.

²⁶Mi ahotbolna chu joulhepna-a atomkhum hijongle, mipi kikhom khom masanga kitahlang ding ahi.

²⁷Koi hile kokhuh laija chu, chua chu ama lhalut teiding; chule song tangpa chunga chu, asong tah chu hungkilekit ding ahi.

²⁸Jousei leiguijin asuhgim ho chu ahokit jin, chule pachat lhem seidoh kamsung hin manthah na atongdoh-e.