Read Thado Chin Thuchihbu 27 Bible Online

Thuchihbu 27 - Thado Chin bible

Thuchihbu 27

¹ Jing nikho-a din kithang at hih-in, ajehchu hiche nikho chun ipi ahinlhun sah ding nangman nahepoi.

²Nang le nang nakamsunga nakivahchoi sangin, gamdang mikhatnin nangma navahchoi johen.

³Song agih in chule neldi agihcheh-e, ahinla mingol lungsatna chu hicheteni sanga chu gihjonalai ahi.

⁴Lungsatna hi thil phaloutah ahin, chule lunghana hi thil nasatah ahi; ahinla thangthipna masanga dingjou ding koiham?

⁵Guhthima kingailut sangin phongtah-a kiphosal aphajoi.

⁶Gol le paijin amavona chu tahsan umtah ahi, amavang melman eichop chu lheplhahna ahibouve.

⁷An vasa hodin khoiju jengjong kidah aumin, ahinla agilkel dingin vang thilkha jouse jong alhumjie.

⁸A-in'a kon vahmangpa chu, vacha abuh-a kon lengmang tobang ahi.

⁹Thaole gimnamtuijin lungsung akipasah-in, chutobang chun lungsunga kona kihilna phatah chun loile gol akipasah theije.

¹⁰Nangma loile gol ahin, napa loile gol ahin jong dalha hih-in; hamset nikhoteng jongle nasopipa in'a chelut hih-in; ajehchu gamlatah a um napenpipa sangin na-in hengpa aphachomjoi.

¹¹Kachapa limgeh inlang, eitamsepa kadonbut theinadin kalung kipasah-in.

¹²Milung chingin thilse hunglhung ding amumasan, hijeh chun akiselin, ahinla mimolhochu achepaijun, talen amanjitaove.

¹³Gamdang mikhat dinga kitepna thilla kitungpa ponsil chu lahpeh-un; chule gamdang numeinu khat dingin kitepna thilin mangun.

¹⁴Jingkah matah-a thouva awsangtah-a agolpa phatthei bohpa chu, amadinga gaosapna-a kilading ahi.

¹⁵Gohajuh nikho-a gomal lha jengjung toh, numei nelhat tahchu kibang bep ahi.

¹⁶Koihile amanu tuhtang jouva chun huipi jong atuhtang jou ahin, chule akhut jetlama thao jong asip thei ahi.

¹⁷Thih in thih mama anol hemthei bangchun, mihem khatnin agolpa maiso chu avahsah theijin ahi.

¹⁸Koihile theichang phung kivettupma chun theichang ga chu aneh teiding ahin; chutobangma chun a-pakaipa ngahjingpa chu jana changtei ding ahi.

¹⁹Twilah ivet le ilim akimudoh ji bangin, mihem lungthimin jong mihem hina aphongdoh jin ahi.

²⁰Thikholmun le manthah na chu imatih-in adim ngaipon, chutobang chun mihem mitnin jong chimtih anei ngaipoi.

²¹Dangka dinga sontwina bel, chule sana dinga lhummei ahin; hinlah mihem chu mi apachat nadung juija kipatep ji ahi.

²²Mingol khatchu nangman sum sunga changbong toh suhtha jongle chun, angolna chu ama-a konin beichomdeh ponte.

²³Nakelngoi hon umdan nahet nadingle, nagancha hon phatecha navettup nadingin pontho tah-in pangin.

²⁴Ajehchu haonahohi tonsotna ding ahipon, lallukhuh jeng jonghi akhang akhanga umding ahipoi.

²⁵Changpol akilahdoh teng hamjing ahung nouthah-in, chule molsang ho-a hamhingho akichomkhom jin ahi.

²⁶Kelngoiho chu navonding ahiuvin, chule kelchaho chu louman ding ahiuve.

²⁷Chule nangman nadon khopset le na-insungmi nehkhop set, chule nanungah umpi chengse khoukhah nadinga lhingset kelcha noi nanei ding ahi.