Read Thado Chin Thuchihbu 28 Bible Online

Thuchihbu 28 - Thado Chin bible

Thuchihbu 28

¹Migilou chu koimacha dellouvin ajamin, midihtah pa vangchu keipibahkai bangin ahang san-e.

²Gamkhat suhkhel jeh-in pipui tamtah ahung umji, ahinla hetkhen themtheina le hetna nei mikhat jala gamsung chu chesotding ahi.

³Mivaicha khatnin mivaicha khatma asuhgenthei chu, nehding khenlou hela lhohmang jeng goju tobang ahi.

⁴Dan pailhaho chun migilouho chu apahchaovin, ahin dan juiho chun amahochu akinelpi jiuvin ahi.

⁵Miphalou hon thutanlhah nahi ahekhen themthei jipouvin, Pakai holte vang chun thiljouse ahekhen them jiuve.

⁶Mivaicha chondih na-a lamjotpa chu, alampi ho-a vahkoi le mihaopa sangin aphajoi.

⁷Koihile dan tuhdetna chu chapa ching ahin; ahinla boina semho toh kivoppa vang chun apa ajumsahjin ahi.

⁸Lamdih louva sumpung lajia chule adihlouva nejipa chun anei apunsahbejin; hinla amapa chun vaichate khotothempa ding-a akhol khompeh ahibouve.

⁹Dan thupeh ho-a kon anakhang heimangpa taona jengjong chu thet umtah ahibouve.

¹⁰Koihile midih aselama kiheimangsahpa chu, amatah-in asem kokhuh sunga chu lhalutteiding; ahinla midihpa vang chun thilphaho aneiding ahi.

¹¹Mihao chu amachang mitmun akichih sah-in, ahinla hetkhenthem theina nei vaichapan ama akholdoh sohjin ahi.

¹²Michonpha te akipa tengule loupina nasatah aumjin; ahin migiloute ahung letdoh tengle mi akisel gamjitai.

¹³Koi hile achonsetna selguh-a chu lolhing louding; amavang koihile hicheho phongdoh jenga chule dalha jenga chun hepina akimuding ahi.

¹⁴Pathen ging jinga umpa chu anunnom ahin; ahinla alung tahsahpa vangchu vangsetna-a chuding ahi.

¹⁵Mivaichate chunga vaihom gilou chu, keipi bahkai kitumle vompi midel hat tobang ahi.

¹⁶Hetkhen themtheina neilou pipuichu misugenthei tah jong ahin, hinla papsetna hotbolpa chun ahinkho akisuhsao ding ahi.

¹⁷Pumhatna thisan so-a chu kokhuh-a jamlut ding; chule koiman apanpi louhel ding ahi.

¹⁸Koihile nolna beija chonlea chu huhhing-a umding ahin; alampiho-a vahkoilepa vangchu lhupai ding ahi.

¹⁹Alou kilhopa chun nehle chah ninglhingsetna aneiding ahin, ahinla pannabei miho nungjuipa vang chun vaichatna akimutei ding ahi.

²⁰Mikitah chu phattheiboh changintin, ahinla hetman louva haoding gopa chu themmo changtei ding ahi.

²¹Sihnei langnei bolhi aphapoi, ajehchu changlhah halkhat jeh-a jong mi chonkhelji-a ahi.

²²Mikilosen hetman louva haoding jeng agelin; achunga vaichatna ahunglhun ding agelpha jipon ahi.

²³Akama pachatna lhem seipa sanga, miphohsal pa chun nungtengle khohsahna akimutam johding ahi.

²⁴Koihile anule apa choma hichehi chonset ahipoi tipa chu, misugampa toh golcha ahi.

²⁵Kiletsahna lungthim neipan kidouna achoh thouvin, Pakaiya atahsanna koipa vangchu phatthei changding ahi.

²⁶Ama chang lunggela kisongpa chu mingol ahin; ahinla chingtah-a kalsongpa chu huhdoh-a umding ahi.

²⁷Koihile mivaicha kithopi-a chu lhasam louding; mivaicha kimumosah vang chun sapsetna tampi akimuding ahije.

²⁸Migilou adindoh teng miho akiseljin, amaho amanthah tengule vang midih apungjin ahi.