Read Thado Chin Thuchihbu 29 Bible Online

Thuchihbu 29 - Thado Chin bible

Thuchihbu 29

¹Tamtahvei akihilchah nunga jong louchal nalaipa chu, hetmanlouva manthah na-a chuding, chule boldamo hella umding ahi.

²Michonpha te vaihoma apanteng mipi akipah-in; ahinla khang gilouten vai ahomteng mipi alunghem jiuve.

³Koihile chihna ngailu-a chun apa akipasah-in, notiho toh kivopma vang chun anei agou jouse asuhmang ahi.

⁴Lengpan thutandih na-in agam aphutdetnin, ahin nehguh kilahpan vang agamchu alehkhup jin ahi.

⁵A-inheng pahcha lhempa chun akeng dinga thang akampeh ahi.

⁶Migilou chu asuhkhelna-a a-oh jin, ahinla michonpha hon la asaovin akipah uve.

⁷Michonphan mivaicha khankho ding angaitopeh-in, ahinla migilouvin hetpeh dingjong agopoi.

⁸Midaichavai hon khopi chu meijin ahal vamun, ahinla miching hon lungsatna aheidoh-un ahi.

⁹Miching khatnin mingol khat chu kinahpi henglang, mingolpa chu kitomhen lang nuijongle chamna umdeh louding ahi.

¹⁰Thisan sohatpan milungdihpa ahotbolin, ahinla midihtah pan vang alhagao huhdoh ding agon ahi.

¹¹Mingolin alungthima agel jouse aseidoh sohkeijin, miching pan vang akichintup-in ahi.

¹²Vaihom khatnin jouthu jeng akhohsah-a ahileh, asohho jouse jong migilou asohji taove.

¹³Mivaichale milhem hatpa akimuto lhonnin, amitlhon jong Pakai hasah ahicheh-e.

¹⁴Dihtah-a mivaichate thu tanpeh lengpa laltouna chu, atonsot geija kiphudet ding ahi.

¹⁵Mol le phosal na-in chihna ape-in, ahinla achama kilha chapang chun anu ajumson ahi.

¹⁶Migilou apunteng dan suhkhelna apungjin, ahinla michonpha ten amaho lhuhchu amudiu ahi.

¹⁷Nachapa nathun nunsah-in, chutile aman nangma olna napehding; chule aman nalung akipasah ding ahi.

¹⁸Khonungthu i-atiding ngaitophah louna achun mipite amangthah jitan; ahinla dan kituhchahpa chu akipah-in ahi.

¹⁹Soh chu kamcheng keovin akisudih theipoi, ajehchu aman hethem jongle adonbut louding ahi.

²⁰Ngaikham le geltoh umlouva thusei namu em? amasangin mingol din kinepna atamjon ahi.

²¹Asoh aneovapat demchatah-a hinkhou khah-a chun, khonung teng hiche sohpa chu chapa-a ahin neiding ahi.

²²Milung chompan kinahna achoh thouvin, chule milungkhoh pan suhkhelna ahaolo jitai.

²³Mihem khat kiletsahna chun ama anoinunsah teiding, ahinla jana chun lungsunga kineosahpa chu atundoh ding ahi.

²⁴Koihile migucha toh kithokhompa chun ama hinna jong ahot ahin, sapsetna ajanan ahin imacha aseipon ahi.

²⁵Mihem ginna hi thangkol kido ahibouvin, ahinla koihile Pakai tahsanna chu hoidoh ding ahi.

²⁶Mitamtah in vaihompa khohsahna chu aholun, ahinla amitakip chunga thutanna chu Pakaiya kon ahibouve.

²⁷Mikitah loupa chu midihpa dingin thet umtah ahin, chule achena lampia nolnabei michu agiloupa dinga thet umtah ahi.