Read Thado Chin Thuchihbu 3 Bible Online

Thuchihbu 3 - Thado Chin bible

Thuchihbu 3

¹Kachapa keima danthu sumil hih-in, ahinla kathupeh ho nalung thimin kichintup jingin;

²Hichun nahin nikho, nahin kumkho, chule lungmona napehbe ding ahi.

³Hepinale thutah chun nangma nadalha hihhel hen; hiteni chu nangonga khivui on ki-onlang, nalungthim sunga lekhajem kijihlut bangin jihlutnin.

⁴ Chutiachu nangman Pathen leh mihem mitmu-a, khohsahna le hetkhen themna chu nakimudoh teiding ahi.

⁵Nalungthim pumpin Pakai chu tahsanin; chule nangma chang hetkhen themtheina-a kingai hihbeh-in.

⁶Nalampi jouse ama hetsah-in, chutile aman nalampi ho nahil ding ahi.

⁷ Nangma chang mitmu-a kichihsah hih-in; Pakai chu gingin, chule agilouva konin jammangin.

⁸Hichu nalaimu dinga damna, chule nagu nachang jouse dinga lhintwi hitei ding ahi.

⁹Nathil lupen le nalhosoh ga masapen chu, Pakai janan tohdoh jengin.

¹⁰Chutile nachangsal ho kidip letsetna; chule nalengpiga hehna-a chu lengpitwi thah hung longlet ding ahi.

¹¹ Kachapa Pakai gimbolna chu nahsahmo loujenin, aman mi asuhdihna jong chu chimchah hih-in.

¹² Ajehchu mipan alunglhaina chapa abolna bangin, Pakaiyin angailut mi chu asudihjin ahi.

¹³Chihna kimudoh-a, chule hetkhenthem theina kisanpa chu anun nom ahi.

¹⁴Ajehchu hichea kivei chu dangka-a kiveina sangin aphan; chule ahung gadoh chu sana thengsel sangin jong aphajon ahi.

¹⁵Amanu chu songmantam ho sangin alujon; chule nangai chat thilho jouse jongchu amanu chutoh tekah hoi ahipon ahi.

¹⁶Amanu khut jetlama hinkho saona aumin; chule akhut veilama haona le jana aume.

¹⁷Amanu lampiho chu nopna lampijong ahin, chule alampiho jouse chu chamna ahi.

¹⁸Amanu kituhchah khahte dingin amachu hinna thingphung ahin; chule amanu kichinjing tapou chu anunnome.

¹⁹Pakaiyin achihna-in leiset anaphutdoh-in; ahetkhen themna-in van ho anatung doh-in ahi.

²⁰Aman ahetna-in munthuh ho ahong jal-in; chule meilomho daitwijin ahin lhahsah-in ahi.

²¹Kachapa hiche hohi namit mu-a konin jam mangsah hih-in; gellhuh them theina le chihna chu ngah tupmin.

²²Hichu nalhagao dinga hinna, chule na-ngong chang dinga kijepna hiding ahi.

²³Chuteng nangma nalampi-a bitkeija nava le-a, chule nakeng jong kipal louding ahi.

²⁴Nangma nalup tengle nakichat tahlouhel ding, chule nangma lumin natin, nomsa tah-a na-imut ding ahi.

²⁵Photlot louva tijatna, ahiloule khang gilouho chunga manthah na ahunglhun teng jongle kicha hih-in.

²⁶Ajehchu Pakai chu nakisonna hintin; chule nakeng chu akisuh khahna dinga kona nachintup pehding ahi.

²⁷Nakhutna boltheina thahat aum petnin, amahon thilpha amudingu chu suhtangpeh hih-in,

²⁸Nahenga gahpehpai jengthei thil aumle, na-inhengpa jah-a, chetan, jingle hungkitjon, petei nange tin seihih beh-in.

²⁹Ama nakoma mongtah-a achen namu manin, na-inhengpa chunga thil gilou gonghih beh-in.

³⁰Aman nangma chunga setna abol louva ahile, ajeh beijin mikhat kidoupi hih-in.

³¹Nangman misugenthei pa chu thangse hih-in; chule alampiho chu kilhen ding gohih-in.

³²Ajehchu milung dihlou chu Pakai dinga thet umtah ahin, hinla ama thuguh chu michonpha te henga aumme.

³³Pakai sapsetna chu khan gitlouna insunga achun: ahinla aman midihtah chenna chu phatthei aboh-in ahi.

³⁴Tahbeh-in aman mi i-sah louva bolho chu i-sah louvin abolin; ahinla mi kineosah ho chu khotona apen ahi.

³⁵Miching chu loupina changding, hinlah mingol hon vang jum na ato dingu ahi.