Read Thado Chin Thuchihbu 30 Bible Online

Thuchihbu 30 - Thado Chin bible

Thuchihbu 30

¹Jakeh chapa Agur thusei ho, themgao thusei ngeichu: hiche mipan Ithiel henga, Ithiel le Ucal heng ngeija thu aseijin;

²Tahbeh-in hi midang sangsanga ngoljo kahin, mihem khatnin hetna aneibangin keiman kaneipoi.

³Chihna kitijong kajil khapon, mithengpa hetnajong kananeipon ahi.

⁴Koiham van'a kaltouva ahiloule hungkum lha-a? Koiham hui akhutna huikhom theija? Koiham twi ponna chuntheija? Koiham leiset kolkimvel anaphut detna? Ama minchu ipi hija, chule achapa minchu ipiham, nangman nasei theijem?

⁵Pathen thu jousehi atheng ahin, chule ama tahsan ho jouse dingin ama chu lumdal ahi.

⁶Nangman athuho chu belap hihbeh-in, achuti loule aman nangma phohsalin natin, thujou seipa nahilo ding ahi.

⁷Keiman nanga konin thilni kangeh-in, kathi masangin hiche teni chu nei-itpeh hihbeh-in;

⁸Keija konin thumanlou le jouthu gamlatah-a neikoi mangpeh jengin; vaichatna ahin haona hijongle neipehdan, keima dinga kakitopibep an achun neivah-in.

⁹Neng behsehleng nangma seilep inting, Pakai chu koiham? katiding; ahiloule vaicha behseh leng kaguhchat ding, ka Pathen min chu mohseh-a kaphah pohding ahi.

¹⁰Apupa henga asottolpa chu hehse hih-in, aman nasapset lontin themo changkhan nate.

¹¹Mihem tamtah apa gaosapma, chule anu jong phatthei bohlou aumin ahi.

¹²Mihem tamtah ama mitmu-a athenga kigel aumin, ahinla athenlou naova chu kisoptheng lou ahiuve.

¹³Mihem tamtah aumin, Oh, amit houchu ichana sanga hitam! amit gei ujong dopsangin aumin ahi.

¹⁴Mihem tamtah aumin, amaho hachu chemjam tobang, chule aha noinung houchu chemcha hemthet tobang ahin; leiset chunga kona vaichate vallhum dingle, mihem lah-a kona lhasamte sugam dinga kigo ahiuve.

¹⁵Votnin chanu ni aneijin, neipen, neipen tin apengin ahi. A-itih-a chimjoulou thilthum aumin, henge, aphatai, tilouhel thil li aume.

¹⁶Lhankhuh le nao neilou naobu; twi dim theilou hel leiset, chule aphatai tilouhel meikou ahi.

¹⁷Apa noisena mitna vea, chule anuthua nunding i-sah loupa mit chu,, phaichama va-ah hon achuhdoh ding, chule mulaopi nouhon anehdingu ahi.

¹⁸Keima dingin datmo umtah thil thum aumin, kahetlou thil li aume;

¹⁹van'a mulaopi lenna lampi, songpi chunga gul kithollena lampi, twikhanglen lailunga kong kitolna lampi, chule pasal khatle nungah khat chena lampi ahi.

²⁰Notinu lampi jong chutobang chu ahi; amanun anen chule amuh akitheh-in, agilou kabol hihbeh-e, atin ahi.

²¹Thilthum jeh in leiset athip theipon, chule thil li athoh theipoi:

²²Soh khatnin vai ahinpoh-a, mingol khat-in sa vasetna ahin neh-a;

²³Mi hotbol jing numei khatnin ji ahin neija, chule soh numei khat apinu goulo dinga ahung umhi ahi

²⁴Leiset chunga neocha cha thil li aumin, ahinla hicheho chu aching cheh ahiuve;

²⁵Sihmi hohin mihem sanga thalhomjo ahivangun, nipilaile amahon anehdiu akigonun;

²⁶Jupihohi lhasam tah ahivangun, songpiho-a buh akisah uvin;

²⁷Khaokhohon leng aneipouvin, ahijeng vangin abonchauvin ahonin achelejiu ve;

²⁸Maimom in akhutnin atuh-in, chule leng inpiho-a aumin ahi.

²⁹Phatah a chekhom thilthum aumin, chule thil li kitoh della chekhom jong aume;

³⁰Keipi bahkaihi gamsa jouse lah-a ahatpen ahin, koima otdohlou ahi;

³¹Uichal ahin, kelchal ahin, chuleh ama dou dinga koima dingdoh khalou lengpa ahi.

³²Nangle nang kichoisang na-a ngolhoi tah-a nachon khah-a, ahiloule nangman thilphalou nagelleh, nakhutnin nakam kisimin.

³³Bongnoi khu icho thipthap le bongnoiha asohjin, inahlhong iheh jongle thisan apotjin, chutobanga chu ilung ihansah jingle kinahna asohjin ahi.