Read Thado Chin Thuchihbu 31 Bible Online

Thuchihbu 31 - Thado Chin bible

Thuchihbu 31

¹Lemuel lengpa thusei ho, anun ahung guilhung dingthu anahilho.

²Ipiham kachapa? Iham kanaobua kon peng kachapa? Chule ipiham kakitepna ho-a kahin kachapa?

³Nathahatna chu numei ho pedoh hih-in, nalampi ho jongchu lengte sumangho pedoh hih-in.

⁴Hichehi lengho ding ahipoi, Vo Lemuel, lenghon ju adonding ahipon, leng chateho dingin jong juchih donding ahipoi.

⁵Amahon donnu henlang danthu sumil taleu, suhgentheija umte chungchang thua lamdih louva thutan na aneikhah diu ahi.

⁶Amangthai ding hochu juchih donsah-un, chule lunggimho chu ju donsah-un.

⁷Aman don henlang avaichatna sumil hen, chule agimnaho geldohda tahih hen.

⁸Mangthah dinga lhuhsahsa umho chungchanga, paomoho dingin nakam keh-in.

⁹Mihem apaomo amadia thu kisei theilou jeh-a suhmanga umtadingho panpinan, nakam keh-inlang seipeh-in.

¹⁰Numei chondihtah koijin akimujou tadem? ajehchu amanu manlutdan chu songmantam ho sangin asangjon ahi.

¹¹A-inneipu chun lungmong selin atahsanin, hitichun amapa dingin lhahsamna kitimong mong umponte.

¹²Amanun ahinkho lhumkeijin amapa dingin thilpha bolin tin, chule thilse bolpeh ponte.

¹³Amanun samul le tupat aholin, alungcham tah-in akhut tah-in na atongin ahi.

¹⁴Amanu chu sumkolvei ho kong innei tobang ahin, gamla tahtah-a konin aman nehle chah ahin polutjin ahi.

¹⁵Amanu janlai jengin jong athoudoh jin, chule a-insungmite chu nehding sa apen, aumpi soh numei ho jong achanding apejin ahi.

¹⁶Amanun loumun khat avechilin, hichu achon, akhutsoh mangchan lengpilei abolin ahi.

¹⁷Amanun thahat na-in atai akigeh-in, chule abantha ahatsah-in ahi.

¹⁸Amanun aveipungho chu aphai ti ahen, amanu meivah jong janle amit ngaipoi.

¹⁹Amanun akhutnin muikung atuh-in, chule akhutnin patkong kung atuh-in ahi.

²⁰Amanun vaichate le, lhasamte dingin akhut alhangdoh jin ahi.

²¹Amanun a-insungmite dingin buhbang hunglha dingjong akichapoi; ajehchu a-insungmite jouse chu ponsanthip cheh-a kivon ahiuve.

²²Amanun amadingin ponsil jemnei akikhonin, amanu von chu lungpon le ponsandup ahi.

²³A-inneipu chu gamsung upaho toh khopi kotpiphunga atouteng mijouse het ahijin ahi.

²⁴Amanun tupat ponnemjet akhongin, ajohjin; chule konggah jong sumkolveipa henga akijoh jin ahi.

²⁵Amanu chu thahatna le jana-in akivonin, ahunglhung ding phatna jong ama kipah thanom ding ahi

²⁶Amanun chingthei tah-in thu aseijin, athusei jong khotona dimset ahi.

²⁷Amanun a-insung chena lampiho phatechan aven, chule thasetna changlhah jong anepon ahi.

²⁸Achate ahung thoudoh-un anunnom nahi atiuve; a-inneipun jong amanu apahcha lheh jengin ahi.

²⁹Chanu tamtah-in chonphat abolin, ahinla nangman amaho chu nakhokhel sohkeije.

³⁰Deisahna hi kilhep lhahna ahin, chule hoinahi pannabei ahi; ahinla Pakai gingjing numei vangchu, choi-atna umding ahi.

³¹Akhutsoh chu amanu peuvin, chule kotpi phunga anatoh jousechun amanu vahchoi cheh hen.