Read Thado Chin Thuchihbu 4 Bible Online

Thuchihbu 4 - Thado Chin bible

Thuchihbu 4

¹Ngaijun, chateho, hetkhen themtheina nakimudoh theina dingun, napan nahilnao hi ngai phaovin.

²Ajehchu keiman nangho thuhilpha kapeh nahiuve, ka danthu dalha hih beh-un.

³Ajehchu keima kapa chapa kahin, khangnou chitchet le kanu mitmu-a ngailut khatseh chu kahi.

⁴Aman keima hiljong einahilin, chule kahenga hitin anaseije; nalungin kathuho chu kichintup min, kathupeh ho kituh detnin lang hinnan neijin.

⁵Chihna kimun, hetkhen themtheina kimun, sumil hih beh-in; kakama thusohdoh ho-a konin jong kiheidoh hihbeh-in.

⁶Amanu dalha hih-in, chule amanun nangma nahoitup ding ahin; amanu ngailun chutile amanun nangma navettup ding ahi.

⁷Chihna hi thil lupen ahi, hijeh chun chihna chu kimun; chule nathil mu jouse chu hetkhen themtheina toh mudohtha teijin.

⁸Amanu choisangin, chutile amanun nangma nadopsang ding ahi. Nangman amanu nakikolchah teng, amanun nangma jabolna mun'a nalhut ding ahi.

⁹Amanun naluchang chu ngailutna-a ajepding; amanun loupina lallukhuh nahenga ahinlhut ding ahi.

¹⁰Ngaijin, vo kachapa, chule kaseihohi kisanin; chutile nahin kumkho sot ding ahi.

¹¹Keiman nangma chihna lampi kahiltan, keiman nangma lamdih ho-a chun kalamkai tai.

¹²Nangma nachele teng nakalson kisudong pontin; chule nalhaiteng jongle nangma kipal lhu ponnate.

¹³Hilchahna chu tuhdetkheh-in, amanu chu lhaso hih in; kivet tupmin, ijeh inem itile amanu chu na hinna ahi.

¹⁴Khang giloute lampia nangma lut hih-in; chule miphaloute lampia cheloujenin.

¹⁵Peldoh-in, anaija chehih in, chua konin kihei mangin, chule chemang jengin.

¹⁶Ajehchu thilse abol louvule amaho a-imu pouvin; chule amahon khattou lhuhna ding abol masang seuvin a-imuthei pouvin ahi.

¹⁷Ajehchu amahon khan gitlouna changlhah chu aneuvin, chule thisan sona lengpitwi adonun ahi.

¹⁸Amavang midihtah te lampi chu vah bangin a-emselin; nikho hoitah asodoh changeija vahcheh cheh tobang ahi.

¹⁹Mikhang giloute lampichu muthim tobang ahin; amaho ipi-a kipal lhu hiuvem aheji pouvin ahi.

²⁰Kachapa kathuseiho phaten ngaijin; kathusei ho-a nanakhang hin sungin.

²¹Hicheho chu namitmu-a konin jam mangsah hih-in; hiche chu nalunggil sunga kichintup min.

²²Ajehchu hiche chu akimudohte dinga hinna, chule atahsa pumpi diuva damna ahi.

²³Chingthei tah-in nalungsung kivet tupmin; ajehchu chua kona chu hinkho-a thilsoh ho hungsoh doh ji ahi.

²⁴Nanga konin jouthu sei chu koimangin; chule alam louva muhthem nachu gamla tah-in koijin.

²⁵Namit chun vejangpet henlang, chule namitnel honjong namasang vejang keihen.

²⁶ Nakeng phangin achot nading lampi kivet phatnin; chule nalampi jouse chu semtupmin umhen.

²⁷Jetlam ahiloule veilama kiheidoh hihbeh in; setna a konin nakeng sepdoh jengin.