Read Thado Chin Thuchihbu 5 Bible Online

Thuchihbu 5 - Thado Chin bible

Thuchihbu 5

¹Kachapa kachihna hi lunglut tah-in ngaiphan; chule kahetkhen themtheina lama hin nanakhang hin sungin.

²Chutile thil datkhen je nahetding, nakamin jong hetna achintup thei ding ahi.

³Ajehchu miphalou nu muh chu khoiju abangin; chule amanu kamsung chu thaosangin analjon ahi.

⁴Ahinla amanu kichaina chu gamsai bangin akhan, hemto chemjam bangin ahemin ahi.

⁵Amanu kengin thinalam ajonsuh in; akalseho chun thikholmun achonlut tan ahi.

⁶Nangman hinna lampi chu lunggil tah-a nangaito louva ahile, amanu lampiho chu kikhel thipthap ahin, chutia chu nangin lampiho chu nahet theilou ding ahi.

⁷Hijeh chun chateho tun kathu ngaijun, chule kakamsung thuho-a konin nangho kiheimang hih-un.

⁸Amanu-a konin nalampi khin gamlan, chule amanu kotphung jong hin nailut hih-in.

⁹Achuti louleh jabola naumna chu midangho kipedoh intin; chule nahinkumkho chu engseho henga kipedoh ding ahi.

¹⁰Nahaona jouse jong gamdang mihon haonan neijuntin chule natohgim ga jouse jong gamdang mi inna lut ding ahi.

¹¹Natahsa leh naphe suhmanga aumteng, achaina keija lunghema naum ding;

¹²Chule nangman seijin natin, itobanga hilchahna kana hotna, chule kalungin phona donse louva anakoi hitam?

¹³Chule jilkung hon eihilnao kana ngaida-a, eithumop ho thupeh-a kanakhang kanasunlou hitam!

¹⁴Keima houkhom nale khoppi lah-a jong, agilouva mangthah paidin kana ume nati ding ahi.

¹⁵Nangma twibel'a konle nangma twikhuh-a kon hung longdoh twiho bouchu donin.

¹⁶Natwinah ho chu thejalin umhen lang, chule vadung twiho chu lamlhongpi dunga longhen.

¹⁷Amaho chu nangma changseh-a bou hihen lang, naum khompi gamdang miho-a hida hen.

¹⁸Natwinah chu phatthei boh-in umhen; chule nakhang donlai na-inneipitoh kipahkhom lhonin.

¹⁹Amanu chu dei umtah sajuh leh lunglhai umtah sajuh chal tobang hihen, amanu anglum chun phatjousen nalung lhaisah hen; chule amanu ngailutna chun nangma a-imatih chanin lung mongin nakoi jinghen.

²⁰Chule kachapa ipi dinga hetkhahlou numei khat toh nakikolchah-a, chule hetkhahlou khatchu nangman nakikoipi ding ham?

²¹Ajehchu mihem lampi jouse Pakaiyin amu sohkei ahin; chule aman amapa chena jouse chu avelhi jingin ahi.

²²Khan gitlouna bolpa chu athepmonan amatchah ding, chule amatah chonsetna chun khao banga akanchah ding ahi.

²³Amachu hilchahna beija thiding, chule angol behseh jeh-a vahmang ding ahi.