Read Thado Chin Thuchihbu 6 Bible Online

Thuchihbu 6 - Thado Chin bible

Thuchihbu 6

¹Kachapa nangma nagol dinga kitepna thila kitung nahi tah-a, gamdang mitoh kikhutsan nahitahle,

²Nakam sunga kon naseidoh thuchengho chun nangma namat den ahitai.

³Kachapa, tun hichehi bolin, nangma le nangma kihudoh-in; nagolpa khutna chu naum tengle, chen, gakisunem min, nagolpa chu galung lhaijin.

⁴Namit chu nguisah hih-in, chule namitteni jong kisin sah hih-in.

⁵Gamlengpa khutna kon sajuhchal akitol doh bangle, thangkampa khutna kona vacha khat akitol doh bangin, nangma kihuhdoh in.

⁶Vo mithase, sihmi henga gachen, alamlhah ho ngaiton lang, chihnan neijin.

⁷Aman apuihoi, avesui, ahiloule vaihom aneipon;

⁸Aman nipilai leh nehding akisuh tupmin, chule chang at laile neh le chah akikhol khomjin ahi.

⁹Vo mithase, itihchan na-imut nahlai ding ham? Itihle na-imutna-a kona nahung kithodoh ding ham?

¹⁰ Chom chakhat na-imun nalulhu kitjin, imudingin nakhut nalhepton;

¹¹Chutia chu vaichatna-in kholjin vahle banga, chule lhahsamna-in hem le thal kikenpa banga nahin lhunkhum ding ahi.

¹²Seingailou mi, mikhang gilou chu jouthu seijin avah lejin ahi.

¹³Aman amit teni asat lhaplhap jin, akengin thu aseijin, akhutjunghon mi ahilji;

¹⁴Aman alungsunga jouthu jeng agelin, thilphalou chu agongjom jingin, kitolouna atun ahi.

¹⁵Hijeh achu achunga vangsetna phulou helouva hunglhung ding; phulou helouva ama jendam thei louva kisuse ding ahi.

¹⁶Hiche thil gup hohi Pakaiyin ahot ahi; Henge, sagi chu amadinga thet umtah ahi.

¹⁷Kiletsah maiso, jouseina leigui, chule mona neilou thisan sona khut,

¹⁸Thil gilou gongji-a lungthim, agiloulam delna-a kaljanga keng,

¹⁹Hettohsah lhem jouthu seija, chule sopite lah-a kitolouna muchi banga tulut jia mihem.

²⁰Kachapa napa thupeh nitnin, chule nanu danthu lhaso hih-in,

²¹Hicheho chu nalungsunga kichin jingin; chule nangonga khivui on ki-o jingin.

²²Nachele teng hichun nalamkai ding, na-imut teng hichun nachintup ding; chule nakhahdoh tengle hichun nakihou limpi teiding ahi.

²³Ajehchu thupeh chu meivah ahin, danthu chu vah ahi, chule kihila kiphosalna chu hinna lampi ahi.

²⁴Hicheho chun numei gilounu-a konle, gamdang numeinu pachat lhemna thuho-a kona nahoitup ding ahi.

²⁵Amanu hoina chu nalungin ngaicha hihbeh in; chule amit hadan jong kilhep lhahsah hih-in.

²⁶Ajehchu jonthanhoi bol numeinu chu pasal khatnin changlhah halkhatna akichoh thei ahin; chule mijongnu chun hinkho manlu tahchu asuhmang ding ahi.

²⁷Mikhatnin a-opma mei achoija, apon kalouva um theijem?

²⁸Mikhat song meihol kitih-am chunga chea, akeng kalouva um theijem?

²⁹Hitia chu a-inhengpa inneipi henga galutna michu, koihile amanu tongkha chan chu themo changding ahi.

³⁰Mikhat touvin agilkel pet tah-a ahinna suhlunglhai nadinga guhchat abola ahileh, min guchapa chu amusit ngaipoi.

³¹Akimatdoh vangle amachun ajat sagi-a aditding; a-insunga thiljouse apeh ding ahi.

³²Ahinla koihile numei khat toh jonga vangchu het themna lhasama ahin, chutobang bolla chun ama hinkho akisuhset ahitai.

³³Amachun mavo nale kijumsona akimuding; chule ama i-sah louva aumna chu kitheh mang joulou ding ahi.

³⁴Ajehchu kithangset hi mihem lunghanna ahin; hijeh-a chu phulahna nikho ahung lhunteng aman khen aneilouhel ding ahi.

³⁵Aman kilhatdohna thil khatcha adonpeh louding; thilpeh tamtah pejongle chun, ama lunglhai louding ahi.