Read Thado Chin Thuchihbu 7 Bible Online

Thuchihbu 7 - Thado Chin bible

Thuchihbu 7

¹Kachapa kathuho kichin tupmin, chule kathupeh ho kikhol khom minlang hin,

²kathupeh ho kichintup minlang hingin, chule ka dan chu namit mu-a alupen hihen.

³Hicheho chu nakhut jungho-a kibunlang; nalungsunga kijih lutnin,

⁴nangman chihna henga chun kasopinu nahi tin, chule hetkhen themtheina chu na inkonu hisah-in,

⁵Chutile hicheho chun gamchom numei nu-a konle, gamdang mi pachat lhem seinu-a kona nahuhdoh ding ahi.

⁶Ajehchu ka-in bangkotna bangvang kah-a kagah ven,

⁷milhamho lah chu kaven, khangdongho lah-a chun, hetkhenthem theina neilou golhang khat kagah lhengdoh theijin,

⁸Amanu umna ningkoi lamlhah-a achepai jengin, chule amapan amanu inlam ajonjelin,

⁹nilhah lam, khothim chipchep in, jan muthim jing noija,

¹⁰veuvin, numei kijoh vona kivonle, dohathuh numei khatnin amapa chu ana kimupi tan ahi.

¹¹(Amanu chu husetah le louchaltah ahin, akengchu a-in'a angaman hihbeh-in;

¹²abang komle amanu apama aumin, abang komle lamlhah-a aumin, chule ningkoi tinchenga achanglhi jingin ahi.)

¹³Hitichun amanu chun amapa chu amanin, achopmin, chule jah motah in amapa henga aseije,

¹⁴keiman chamna kilhaina thilto kaneije, tuni hin keiman kakitepna ho kapetan ahi.

¹⁵Hichejeh-a chu nangma kimupi dinga, gunchu tah-a namaiso holdinga kahung vadoh ahin, chule nangma kamudohtan ahi.

¹⁶Kajalkhun jemhoitah khaodip ponin, akigeitho thilho-in, chule Egypt tupat ponnemjetnin kajem joutan ahi.

¹⁷Kajalkhun chu myrrh, aloes chule thingthal gimnamtuiho-a keiman kasu namtuisoh keijin ahi.

¹⁸Hungin jingkhovah kahsen eini chimsetnin kinou hitin, mongtah-in kinou chimset hite.

¹⁹Ka inneipao la ina aumpoi, gamlatah-a jindoh ahi.

²⁰Aman sum dip khat akisemin, nikho atepni lebou in hunglhung ding ahi.

²¹Amanun thu ngeitah seijin, amapa chu ajol lhatan, amuh nal-heu pachatna lhemin amapa chu athujo tan ahi.

²²Bongchal khatnin akithana ding mun, ahiloule mingol khatnin bul akituh nading bangin; amapan amanu nungchu ajuijel tan;

²³Thalchangin athinlung asutpai bangle; vacha khat kikin sah tah-a thanga a-o tobangin, amapan ahinkho manthah ding akihet pon ahi.

²⁴Hijeh chun vo nangho chapangho kaseihi kingaijun; chule kakama hungsoh doh thuho hi kigel phatnun.

²⁵Amanu chena lama chun nalung onsah hih-in; amanu lampiho a chun kiheimangin lut hihbeh-in.

²⁶Ajehchu amanun mi tamtah ama put sahtan; chule mihat tamtah jong alousahjou ahitai.

²⁷Amanu in chu thikholmun jotna lampi ahin; thina indanho jotsuhna ahi.