Read Thado Chin Thuchihbu 8 Bible Online

Thuchihbu 8 - Thado Chin bible

Thuchihbu 8

¹ Chihna chun kholhang asapji hilouham? chule hetkhen themtheina-in a-aw ahin sodohji hilouham?

²Amanu munsang vumlai tah-ah, lamthom tina adingin ahi.

³Amanun kotpi phungho, khopi lutnaho chule kotna hung lutna ho-a asamlen ahi.

⁴Vo miho kahinkou nahiuve, chule ka awgin hin mihem chapate chu akou ahi.

⁵Vo nangho milhamte, chihna kihet themun; chule nangho mingolte, hetkhen themtheina lungthim neijun.

⁶Ngaijun, ajehchu thilpha chung nungho kahinsei ding ahin; chule kakamsoh chun thilpha ngen aseiding ahi.

⁷Ajehchu kakamin thutah aseiding, chule phatlouna chu kakam dinga thet umtah ahi.

⁸Kakama kon sohdoh thucheng jouse chu chonphatna ahin, hicheho-a chun khan gitlouna leh vakoina aumpon ahi.

⁹Ahekhen themtheipa dingin hicheho chu akicheh-in; chule hetna kimudoh tedin adih chu ahi.

¹⁰Dangka sangin hilchahna chu kisanin lang, chule sana deitah sangin jong hetna chu kisanin,

¹¹ajehchu chihna hi songmantam sangin aphajon; chule deithei thilho jouse chutoh tekah theihoi ahipoi.

¹²Chihna kiti keima hi datkhenthem natoh kacheng khomin, chule keiman hetna leh chihnaho kamudoh in ahi.

¹³Pakai gin kitihi thilse hot bolding hi ahin; Kiletsahna, hoithona, setna lampi, chule jou seina kam hi keiman kahot ahi.

¹⁴Chihna giltah leh thumop chu keija ahin, keima hetkhenthem theina chu kahin, chule thahatna kaneije.

¹⁵Keima jal-in lenghon vai apouvin, chule pipuihon dihtah-in thutana abolun ahi.

¹⁶Keima jal-in pipuiho, milal ho, leiset pumpi-a thutan ho jengin jong vai ahomun ahi.

¹⁷Keima eingailute chu kangailun; chule matah-a eiholte chun eimudiu ahi.

¹⁸Haonahole jana keija aumin, henge, haosatna le chonphatna jong keijah aume.

¹⁹Kaga hi sana sangin aphajon, ahi, sana phapen sangin aphajoi, katoh dohsa jong hi dangka lhentum sangin aphajoi.

²⁰Chonphatna lampi-a kalamkaijin, Thutanna lampiho lah-a kalamkaije.

²¹Chutia chu eingailute chu keiman gou kalosah ding; chule agouho chu kadimsetsah ding ahi.

²² Khanglui laija Pakaiyin na anatoh masang, chule alampiho kipat tilla, aman keima einanei ahitai.

²³Keima tonsotna pat, abula pat, ahilouleh leiset ana kisemdoh masanga pat eina kitungdoh ahitai.

²⁴Munthuh tah anaum masang, twinengtah-a akikholna twinaho ana um masanga pat, keima anakipodoh kahitai.

²⁵Mol le lhangho anaum masanga, keima einakipo doh-a kahitai.

²⁶Aman leisetle gamho, vannoi leiset sangpen asemdoh masang peh-a jong anaum kahitai.

²⁷Aman vanho anagona, munthuh akolkhum laichun, keima kana ummin ahi.

²⁸Aman chunga meilomho anaphudoh-a, twinah thuhho anahatsah laichun,

²⁹Aman twiho akiveina kalval akhokhel louna dinga, leiset bul aphudoh a chu twikhanglen thupeh ananei ahitai.

³⁰Chuti chun amatoh thilkhat hung kikhoukhah bangin ama koma kana ummin; chule ama anga kipah jingle, nitinna ama dei kanahin,

³¹Pathen semsa leiset chen nathei munkhatna chun kanakipah-in; chule kalunglhaina chu mihem chapate chunga anaumin ahi.

³²Hijeh chun tun vo chateho, kathu sei hi kichintup mun; ajehchu kalampiho nit chan chu anunnom ahi.

³³Hilchahna kingaijunlang, chihnan neijun, hichu pampai hih-un.

³⁴Kathusei phatecha ngaija, nitina kakotpiphung velhijing, kakot bulho-a ngahjingpa chu anunnom ahi.

³⁵Ajehchu koihile keima eikimudoh-a chun hinna akimudoh ahitan; chule Pakai lunglhaina chu changding ahi.

³⁶Ahinla keima douna-a chonsepa vang chun, amatah hinkho chu dihlouva akibol ahi. Keima eihotbol chanchun thina joh angailut ahi.