Read Thado Chin Thuchihbu 9 Bible Online

Thuchihbu 9 - Thado Chin bible

Thuchihbu 9

¹Chihna in a-in akisah doh-in, chule khompi jong sagi atungdohtai.

²Amanun aganchaho akitha-in; ajuho jong ahaltoh-in, adokhangho jong ajem joutai.

³Amanun asoh numei ho asoldoh joutai; amanun khopi sunga munsangpena kon asamin,

⁴Milham koi hile hilama hungkile heihen, hetthem theina ngaichaho henga chun amanun aseijin,

⁵hungin, ka changlhah nenlang, kahalsa juhi hungdonin ati.

⁶Ngolna chu dalhanlang hingin; chule hetkhen themtheina lampia chen.

⁷Mitaitom hat ho phoh-a, adih bolsah ding gopa chu ama le ama akijumso jin, chule agilou phohsala chun gimna akimun ahi.

⁸Mitaitom hatchu suhdih ding gohih-in; aman nahot loding ahi. Miching chu phoh le chun aman nangailut ding ahi.

⁹Miching chu hilchah lechun ama ching cheh ding: Midihtah pa chu hil lechun, chutile ama hetna lama khangtou ding ahi.

¹⁰ Pakai gin hi chih kipatna chu ahin; Mithengpa het kiti jonghi hetkhen themna chu ahi.

¹¹Ajehchu keima-a nahin nikhoho kipunsah-a; chule nahinkumho kisutam ding ahi.

¹²Nangma aching nahile, nangma dingabou ching nahin; ahinla nangman nataitomle, hichu nangman nachanga nakipoh ding ahi.

¹³Numei ngolchu akam atamin, mimol ahin, chule hetna imacha aneipoi.

¹⁴Amanu akotphunga atouvin, khopisunga munsang ho-a touna-a jong atouji-e.

¹⁵Achena ding lampia jangpetna chehon ahin jotpa tengule akoujin ahi.

¹⁶Milham koi hile hilama hungkile heihen, hetthem theina ngaichaho henga chun amanun aseijin,

¹⁷Twi kigu chu alhumin, chule changlhah aguh a kine chu atuije.

¹⁸Ahinla amapan hia chun thina aume, chule amanu jinho chu thikholmun thuhlaija um ahiuve ti ahepon ahi.