Read Thado Chin Thuhilpa 1 Bible Online

Thuhilpa 1 - Thado Chin bible

Thuhilpa 1

¹Jerusalem lengpa David chapa thuhilpa thusei ho.

²Pannabei ho pannabei ahi tin thuhilpan aseije, pannabei ho pannabei; ijakai pannabei ahi.

³Mihem khatnin nisa noija atohgimna jouse-a kona ipi phatchomna aneinah em?

⁴Khang khat achemangjin, chule khangchom khat ahunglhung kitji-e; ahinla leiset a-imatih-in aum jingin ahi.

⁵Nisa jong ahung sohdoh-in, nisa alhumkit jin, chule ahung sodohna lam mama-a akileloi jitai.

⁶Hui chu lhanglam ngan anungin, chule sahlam ngan ahung lennun jin; tanglouvin akipei pei jengin, chule anundan kisem dungjuijin ahunglenun kitjin ahi.

⁷Vadung jouse twipia alonglut nun, ahijeng vangin twipi chu adimdehpoi; vadungho chu ahung londohna lama chun akile kitnun ahi.

⁸Thil jousehi tohgimnan adimsetnin, mihemin aseidoh theipoi; mitla thilmu achinpon, nakol jong athujah-a adim theipoi.

⁹Thil anaumsa chu, ahung um kitding mama chu ahin; chule anakibolsa chu, ahung kibol kitding chu ahije; chule nisa noijahin thilthah ima aumpoi.

¹⁰Ven thilkhat chungchanga, hichehi athah ahi-e, tia gahsei thei umem? Eiho masangpeh, gollui laija ana umsa jeng ahi.

¹¹Masanglai thilho geldohna aumpon; khonunga hung umding honjong ahunglhung ding thil ho geldohna neideh pouvinte.

¹²Thuhilpa keima hi Jerusalem'a Israel chunga leng kanahi.

¹³Chule keiman vannoi'a thil kitongdoh ho jouse chung changhi chihna-a hola kholdoh nadin kalung kanapen ahi; hichehi Pathen'in akisinsah nadiuva mihem chapate chu thohgimna nasatah hi anapeh ahi.

¹⁴Keiman nisa noija nakitongsa jouse chu kamutai; chule veuvin aboncha keijin pannabei le lhagao sunohphah ahibouve.

¹⁵Akonsa chu kisujang thei louding; chule akisama chu kisimtha theilou ding ahi.

¹⁶ Kalungthimin keima le keima kakihoulim jin, hitin kati; veuvin, keiman mun jaotah chu kahin phatai, chule Jerusalem'a keima masanga anaumho jouse sangin chihna kakimube tai: Tahbeh mongin kalungin chihna le hetnalam hetdohna lentah aneitai.

¹⁷Keiman chihna, ngolna, chule ngolchona hetdoh nadin kalung kanapen; hiche jonghi lhagao sunohphah ahi ti kamudoh-in ahi.

¹⁸Ajehchu chihna tamna-a gimna atamin; chule hetna haopa chun lungkhamna ahaove.