Read Thado Chin Thuhilpa 10 Bible Online

Thuhilpa 10 - Thado Chin bible

Thuhilpa 10

¹Thousi thisahon thao namtui sempa thaonam a-uisah-in, chutobang chun ngolna themkhat-in achihna le aja umna jeh-a kijabolpa chu asuminsen ahi.

²Miching lungthim chu akhut jetna aumin, ahinla mingol lungthim chu aveilama aume.

³Mingol chu alampia akalsonteng jongle, achihna chun alosam sah-in; chule mijouse henga mingol kahi tin aseilen ahi.

⁴Vaihompa lungthim chu nangma douna-a ahung kipatdohle, nangman naum namun dalha hih-in, ajehchu kipehlutna hin suhkhelna lentah asemphan ahi.

⁵Vaihompa-a kona suhkhel hungdoh banga, keiman nisa noija thilse kamudoh aume:

⁶Ngolchon nahi jatah-in akikoi sangin; chule mihao chu mun nema atouvin ahi.

⁷Sakol ho chunga soh ho atouva, chule pipuiho tolla soh ho banga avaleu kamun ahi.

⁸ Koi hile khuh laija chu, akokhuh laija ama lhalut ding; chule koi hile tho kikai tumsepa chu, gul'in achuhding ahi.

⁹Koihile songho ladoh-a chu, chua chu kisukha ding; chule koihile thing chenna chu, chua chu kisukha ding ahi.

¹⁰Heicha chu amola, amangcha pa chun aha chu akinol hem loule, atha ahaje ding ahi; ahinla chihna hi lamhil dinga phatah ahi.

¹¹Tahbeh-a gul'in lhimlouva achuh pai bangin, kamtam jonghi aphat chomna aumpoi.

¹²Miching kamsoh thuchengho chu lungsetna ahin, hinla mingol kamsoh vang chun amatah aval lhum ding ahi;

¹³Akamsoh thubul hochu ngolna ngen ahin, ahoulim kichaina chu lung bulhinglou setna ngol thubuh ahi.

¹⁴Mingol jong chu thua dim ahi; mihemin ipi ahunglhun ding asei theipon, chule ama nunga ipi ahunglhung ding kon aseipeh theijem?

¹⁵Mingol tohgimna chun amaho jouse asulung jing game; ajehchu aman khopisung jona iti che dingham ti ahepoi.

¹⁶Vo gamsung, nalengpa chapang neocha ahia, chule napipui hon jingkah-a nehkhom na aneijule, ohe ada nahi!

¹⁷Vo gamsung, nalengpa chu milunlaiho chapa ahi-a, chule napipui hon khamna ding hilouva, thaneina dingjoh-a, aphatcha nehkhom na aneijule, anunnoma nahi!

¹⁸Thaset behset jeh-in in angot lhajin, chule khut thaset vangin in alhujin ahi.

¹⁹Golvah hi nuina dinga kibol ahin, chule ju hin mi akipa sah-in ahi; ahinla sumin thiljouse ahisah theijin ahi.

²⁰Nalungthim jengin jong lengpa chu samse hih in; chule nalupna dansunga jong mihao samse hih-in: ajehchu chungleng vachan na aw po khan tin, chule lhaving neikhatnin athu galhut khante.