Read Thado Chin Thuhilpa 11 Bible Online

Thuhilpa 11 - Thado Chin bible

Thuhilpa 11

¹Nachanglhah twi chunga seplhan; ijeh inem itile nikho tamtah jouteng namu kitding ahi.

²Mi sagi henga, chule get henga jong chanvou pe-in; ajehchu nangman leiset chunga itobang thilse ahunglhun ding nahe poi.

³Meilomho go adimset tengle, amaho le amaho leiset chunga ahung kilhei-ong jiuve; chule thingphung chu lhanglam ngan, ahiloule sahlam ngan lhutaleh, alhuhna mun laitah-a chu, kijamden jengding ahi.

⁴Huinun vejing pa chun muchi atulouding, chule meilomho khohsah jing pa chun chang a-at louding ahi.

⁵Nangman hui chena lampi nahetlou bangle, numei naovop sunga aguho iti khanlet ham nahetlou bangin; ijakai sema Pathen natoh ho jong nahepon ahi.

⁶Jingkah lamle namuchi kitun, chule nilhah lam jongle nakhut umthimsah hih-in; ajehchu hichepa ham, khuchipa ham, hoichepen chu hung phatou dingham, ahiloule ania kibanga phading ham ti nangman nahepoi.

⁷Tahbeh-in vahhi anomin, chule mit dingin nisa vet hi anomta ngeije.

⁸Hijongle mihem chu kum tampi ahina, hicheho jouse-a chu akipa le; muthim nikhoho chu kigeldoh hen, ajehchu hicheho chu tamtah hiding ahi. Ahunglhung jouse chu pannabei ahi.

⁹Vo gollhang, nakhangdon na-a kipah-in; chule nakhangdon lai nikhon nalung thimin nakipasah jinghen, nalungin adeilam le namitnin amu nomna lam chu juijin; amavang thil hichengse jeh-a hi Pathen'in thupi tanna-a napuilut ding ahi, tihi nangman kihet nin.

¹⁰Hijeh chun nalungthima konin hesohna koidoh in, chule natahsa-a konin aphalou koimangin; ajehchu chapanlai le khangdonlai hi pannabei ahi.