Read Thado Chin Thuhilpa 2 Bible Online

Thuhilpa 2 - Thado Chin bible

Thuhilpa 2

¹Keiman kalung sunga, tun chen, keiman nangma thanop na-in napatep inge, hijeh chun nopsahna hinkho mangin, tin kaseije: ahin, veuvin, hiche jonghi pannabei ahi.

²Keiman nuina hi, ngolna ahi kati; chule thanopna hi, ipin ahin sodoh ham?

³Chihna toh kalungsung kiheto-a kakoi jeng vangin, keiman kalung sunga ju lama kakipeh nading; chule mihem chapatehon ahin nikho lhumkei uva, vannoi'a amaho ding atohdoh uva pha kamudoh kahsen, ngolchon nalama kipenge tin, kangaiton ahi.

⁴ Keiman natohlen len katongin; keima din in tampi kakisah-in; chule lengpigui hon tampi kakibolin ahi.

⁵Keiman hon le theilei tampi kakibolin, hiche sunga chun thei namkim kaphutnin ahi.

⁶Keiman gammang hinsodoh-a thingphung ho twichap dingin, twikul tampi jong kakilaijin ahi.

⁷ Keiman soh pasal le soh numei tampi kaki choh-in, ka-insunga pengden soh tampi kaneijin; keima masanga Jerusalem'a anaum ho jouse sangin gancha alenle aneo kanei tamjon ahi.

⁸ Keiman dangka le sana, chule lengho le gamkai ho neile gou kidang dangho jong kakichom khomin; Keiman numei lasathem le pasal lasathem, chule mihem chapate kipana thei, tumgingthei manchah ho jatkim keijin kakichom khomin ahi.

⁹ Hitichun keima kanaloupi-in, chule kamasanga Jerusalem'a ana umho jouse sangin kanakhang touvin; chule ka chihna jong aum aumpeh-in ahi.

¹⁰Chule kamit tenin amunom tapou chu musah louvin kakoipon, kipana-a konin kalungthim kakham chah poi; ajehchu katohgim najousea kalung akipah-in, chule hiche chu katoh gimna jouse-a kona kachan chu ahi.

¹¹Chujouvin keiman kakhut teni-a kanatohdoh ho jousele, tohgimna-a katohdoh ho kaven; chule, veuvin, aboncha chu pannabei le lungthim kisuhboina anahi bouvin, chule nisa noija hin imacha aphachom aumpoi.

¹²Chuin keima chihna le ngolna chule ngolchona ngaitodin kakiheitan ahi: ajehchu lengpa nunga hungpa chun ipi aboldoh dingham? ana kiboldoh sajeng bou hiding ahi.

¹³Chujouvin keiman vah-in muthim akhokhel banga, chihna-in ngolchon na akhokhel chu kanamudoh tan ahi.

¹⁴Michingpa mit teni chu aluchunga aumin; ahinla mingol vang chun muthim lah-a lam ajotnin ahi. Chule thilsoh khatchu abonchau chunga asoh-e ti keima tah-in kamudoh tai.

¹⁵Chujouvin keiman kalung sunga kaseijin, mingol chunga thilsoh tobang, keima chung jenga jong asoh-in; achutile ipidinga ching jep kahim? kati; chuin kalung sunga, hiche jonghi pannabei ahi kati.

¹⁶Ajehchu a-imatih chanin miching chu mingol sangin geldoh-in aumdehpoi; tu-a umho jousehi ahunglhung ding nikho hole suhmila umsoh keiding ahi. Chule mi michingpa chu iti thi ham? mingol tobanga thi ahi.

¹⁷Hijeh chun keiman hinkho kahon ahi; ajehchu nisa noija nakitong doh hi keima dingin lungkhamna jeng ahi. Ajehchu imajouse pannabei le lungthim kisuhboina ahi.

¹⁸Dihtah-in keiman nisa noija katoh gimna jouse kahon ahi; ajehchu keiman kanunga hungpa dinga kadalhah pehding ahi.

¹⁹Chule amapa chu miching ahi mingol ahiding koijin ija ahetnem? hijeng jongle keiman nisa noija kachihna vetsahna-a, gimtah-a katohdoh ho jouse chung, aman vai ahop ding ahi. Hiche jonghi pannabei ahi.

²⁰Hijeh chun nisa noija katohgimna ho jouse-a chun kalung kathoi sah-in ahi.

²¹Ajehchu chihna, hetna chule thudih-a tong gima mi aumin; ahijeng vangin amapan tonggim louhelpa chan dinga adalhah pehding ahi. Hiche jonghi pannabei le thil phaloutah ahi.

²²Ajehchu mihem khatnin atohgimna jousele, alunggimna chule nisa noija atohgim naho-a ipi amu-em?

²³ Ajehchu anikhoho jouse chu gentheina ahin, chule athohgimna jong lunghemna ahi; tahbeh-in, janteng jongle alungsung aolpoi. Hiche jonghi pannabei ahi.

²⁴ Mihem khatnin an aneh-a, twi adona, chule ahinna-in atohgimna chunga nop asah sanga phajo aumpoi. Hiche jonghi Pathen khutna kon anahi ti, keiman kana mudoh-e.

²⁵Ajehchu keima sanga koijin an neh akimu joh-a, ahiloule koijin nom asah joh-am?

²⁶ Ajehchu Pathen'in ama mitmun mipha chu chihna le hetna chule kipana apen; ahinla michonse vang chu, Pathen ang sunga miphapa peh ding chomkhom ding le sevum dingin, thoh hahsa apen ahi. Hiche jonghi pannabei le lungthim kisuhbohna ahi.