Read Thado Chin Thuhilpa 3 Bible Online

Thuhilpa 3 - Thado Chin bible

Thuhilpa 3

¹Thil jouse din phat aumcheh-in, chule vannoi'a chule thil kigong jousen phat anei cheh-e.

²Penphat aumin, chule thi phat aume; aphu phat aumin, chule akiphutsa bodoh phat aume.

³Thaphat aumin, chule boldam phat aume; phetlhah phat aumin, chule sahdohna phat aume.

⁴Ka phat aumin, chule nui phat aume; lunghem phat aumin, chule lam phat aume.

⁵Songho paidoh phat aumin, chule songho lokhom phat aume; kikolchah phat aumin, chule kilhakang phat aume.

⁶Amu phat aumin, chule mansahna phat aume; chintup phat aumin, chule paidoh phat aume.

⁷Bo-eh phat aumin, chule khuibit phat aume; thipchetna umphat aumin, chule paodoh phat aume,

⁸Kingailut phat aumin, chule kimuda phat aume; kigal phat aumin, chule kicham phat aumin ahi.

⁹Atongpa chun atohgimna-a kona ipi phatchomna aneijem?

¹⁰Keiman mihem chapate kisinsahna dinga Pathen'in apeh thoh hahsat nachu keiman kamutai.

¹¹Aman thil ijakai jouse aphatchan hoitah-in asemin ahi: chujongle koimachan Pathen'in abula patna ajona geija ipi atoh doh-em ahetdoh joulouna dingun, alungthim sunguva vannoi thu akhumpeh tan ahi.

¹²Ahinla mihem chu akipa thanopma, ahinkho-a thilpha abol tilouvin, amaho-a thilpha aumpoi ti keiman kahen ahi.

¹³Chujongle mihem jousen aneh-a, adona chule atohgimna jouse-a kona thilpha nomtah-a amanchah ding ahi, hichu Pathen thilpeh ahi.

¹⁴Pathen'in abol tapou chu a-imatih chana ding ahi, ti keiman kahei; chuche chunga chu belapthei, chule lahdohthei jong aumpoi. Chule hichehi Pathen'in mihemte ama angsunga kicha tah-a aumna diuva abol ahi.

¹⁵Ana umsa chu tu-a umhi ahi; chule ahung umding jong chu anaumsa chu ahin; chule Pathen'in achesa chu anung holin ahi.

¹⁶Chule chuche chungchon chun keiman nisa noija thutan na mun chu kamun, chua phatlouna aum; chule chonphatna mun'a khangit louna aum kamun ahi.

¹⁷Pathen'in michonpha hole migiloute chung thu atanding ahi; ajehchu thil kigong le thil kiboldoh chengse dingin phat khat aumcheh-e, tin keiman kalungsunga kaseijin ahi.

¹⁸Mihem chapate umdan chungchanga hin, Pathen'in amaho hinphong doh henlang, chule amahotah in jong sahem ahiuhi kimudoh theileu, tin kalung sunga kaseijin ahi.

¹⁹Ajehchu mihem chapate chunga thil lhungchu sahemho chunga alhungin; thilkhat jeng jong amaho chunga alhung gellin ahi: khat athi bangin, khatjong athin; tahbeh-in, abonchauva haitheina kibang neicheh ahiuve; chutichun mihemin sahem chunga chungnunna aneipoi. Ajehchu aboncha pannabei ahi.

²⁰Abon chaovin munkhat ajon cheh-un, abon chaova vutvaija kon ahiuvin, chule abon chaovin vutvai asoh kit jiuve.

²¹Mihem lhagao chunglama kaltouva, chule sahem lhagao leisetna akumsuh koijin ahet khah-em?

²²Hijeh chun mihem chu anatoh ho-a kipah thanoma aumding sanga phajo adang aumpoi ti keiman kahedoh tai; ajehchu hichu ama chan ahin; chule ama nunga ipi asoding ve dinga koijin ama apui ding ham?