Read Thado Chin Thuhilpa 4 Bible Online

Thuhilpa 4 - Thado Chin bible

Thuhilpa 4

¹Chuti chun kahung kilen, nisa noija suhgentheina jouse chu kangaitoi: chule veuvin, joulhepma umte mitlhi chu, amahon lhamonsah aneipouvin; chule amaho sugentheite henga chun thaneina aume, ahinla amahon lhamonsah aneipouve.

²Hijeh chun keiman ahingho tu-a hing nalaiho sangin, athiho tu-a athisaho kapah chajon ahi.

³Tahbeh-in, amani sangin, tuchan geija umkha loulai, chule nisa noija thilse kibol mukhalou laipa chu aphajoi.

⁴Avelin, keiman mihem khat aheng akomin amit thip lona thohgimnaho jouse le natohphaho jouse chu kangaiton; hiche jonghi pannabei le lungthim kisuhboina ahi.

⁵Mingolin akhut asim tumin, chule ama le ama tahsa akineh jin ahi.

⁶Thohgim tahle lungthim kisuhboi puma khut ni dimsei neisangin, lungdam sella tah-a khut khat dim nei aphajoi.

⁷Chujouvin keima kahung kile kitnin, chule nisa noija pannabei chu kamu doh-e.

⁸Khatsehbou aumin, anina aumpoi: henge, aman cha aneipon sopi pasal jong aneipoi; ahinla atohgimna aki ngahtih aumpon; amit jong chu haonaho-a alunglhai joupon; koidinga katoh-a, chule kahinna thilpha kachansah louham? tin aseidehpoi. Hichejonghi pannabei ahin, nasatah-a thohgimna ahi.

⁹Khat sangin ni aphajoi; ajehchu atoh gimna lhona kipaman phatah amulhonin ahi.

¹⁰Ajehchu alhuh hon jongle, khat chun aloipa aphohding ding ahi; ahinla achanga umpa chu alhuh teng ada ahi; ajehchu aman akithopi ding aneipon ahi.

¹¹Chukitle mi ni alupkhom lhonle, akinehlum to lhonin; ahinla khat changseh chu iti kisuh lum thei ding ham?

¹²Chule khat touvin ama hindou taleh, mi nin amapa chu anan jouding ahi; chule khaohol thum kiheh kop chu atanbai pon ahi.

¹³Leng tehse ngoltah, thumop sangthei lou hisangin; chapang vaichatah le chingtah hi aphajoi.

¹⁴Ajehchu amachu songkul'a konin leng chang dingin ahungpot doh-in; hijongle ama lenggam sung mama-a peng khatchu ahung vaicha theije.

¹⁵Keiman nisa noija kalsong hinna neiho jouse chu, ama khela lenga hung pangding cha ni lhinna chutoh kagah ngaito khomin ahi.

¹⁶Mipi jouse leh amaho masanga anaumho jouse kichaitih aumpoi; nunga hung dingho jong ama chunga kipah deh loudingu ahi. Tahbeh-in hiche jonghi pannabei le lungthim kisuhboina ahi.