Read Thado Chin Thuhilpa 5 Bible Online

Thuhilpa 5 - Thado Chin bible

Thuhilpa 5

¹Pathen in'a nache tengle nakeng kivet phatnin, chule mingol ho longlhenna thilpeh sangin thu ngai dingin kigo jingin umjon; ajehchu amahon thilse aboluve ti angaito phapouve.

²Nakam tamsah hih-in, chule Pathen angsunga thilkhat phongdoh dingin nalung kino dahen; ajehchu van'a Pathen aumin, nangma leiset chunga uma nahi; hijeh chun nathu seidoh chu lhom sah-in.

³Ijeh inem itile kisah lelna tamtah jala mang umji ahin, chule mingol aw chu athu tamseija konin akihen ahi.

⁴ Pathen henga kitepna khatna nakitep teng, peh ding ngongkai hih-in; ajehchu aman mingol ho-a kipana aneipoi; nathutep chu pe jengin.

⁵Nakitepna pelouva naum sangin, nakitep louma apha jon ahi.

⁶Nakam chu natahsa chonsetsah nadingin phal hih-in; vantil masanga jong hichehi suhkhel ahi tin seihih in. Ipidinga Pathen chu na aw-soa lunghanga, nakhutsoh thilho asuh manghel dingham?

⁷Ajehchu mang tamnale thu tamna-a chun pannabei tampi jong aumjie; ahinla nangman Pathen chu gingin.

⁸Nangman gamsunga mivaichate kisuh gentheina, chule thutanlhahna le thudih pumhatna akibol namu-a ahile hichu datmo hih-in; ajehchu asang penpa sanga sang jopan akhohsah nan; chule amaho sanga sangjo aumnai.

⁹Hiche chungchon chun leiset phatchomna hi mijouse dinga ahi, lengpa tah jengjong louma-a hinga ahi.

¹⁰Dangka ngailupa chu dangka-a lunglhai joulou ding, ninglhin na ngailupa chu punbe na-a lunglhai louding ahi; hiche jonghi pannabei ahi.

¹¹Thil le lo apunbe teng, aneding jong apunben; chule chuche neiho dinga chu, amitnuva amu-u tilouva aphat chomna ipi umam?

¹²Tamtah nehen lhomcha nejongle natong gimpa imut chu anomin; ahinla mihaopa haosatna chun ama a-imut sahpon ahi.

¹³Keiman nisa noija thil phaloutah khat kamu aume; hichu haonahi aneipa kisuhkhah nadinga kikoija ahi.

¹⁴Ahinla chuche haonaho chu thoh hahsatna phaloutah jeh-in amangthah jin, chule aman chapa khat ahingin, chule imacha akhutna aumpoi.

¹⁵ Amapa anu naobu-a kona ahungpot banga chu, ahung bang banga sagoh keova kile kitding, chule akhutna akichoi mang thei, atohgimna-a kona ima aki kenthei louding ahi.

¹⁶Chule hiche jonghi thilsetah ahin, lamjouse-a ahung bang banga, kinungle cheh ding ahi. Chule ahomkeo dinga tonggimpan ipi phatchomna aneijem?

¹⁷Aman ahin nikho jousen muthim lah-a an anen, chule hesoh tampi, lungsatna tampi chu anatna to athoh than ahi.

¹⁸Veovin, keiman kamudoh hi; Pathen'in mihem khat apeh ahinkho lhumkeija; nisa noija atohgimna jouse-a, an aneh-a, twi adona, akipa thanop dinghi thil phatah le kilomtah ahi; ajehchu hichu ama chan ahi.

¹⁹Amitakip henga Pathen'in haona le neile gou apen; chule chuche-a kona chu neding le, achan kilah nading, chule atohgimna-a akipa theina dingin thaneina apen ahi; Hichehi Pathen thilpeh ahi.

²⁰Ijeh inem itile aman ahinlai nikhoho chu hageldoh theiponte; ajehchu Pathen'in alungsung kipana-in adonbut tan ahi.