Read Thado Chin Thuhilpa 6 Bible Online

Thuhilpa 6 - Thado Chin bible

Thuhilpa 6

¹Nisa noija thilse khat keiman kamui; chule hichu mihemte lah-a umjing thil ahi.

²Pathen'in mihem khat ahinan angaichat jouse imacha alhahsam louna dinga haosatna, neile gou, chule jana apen, ahijeng vangin Pathen'in chuche ho-a kona chu aneh theina ding tha apepon, ahinla gamdang min bou anen ahi. Hichehi pannabei, nat phaloutah ahi.

³Mihem khatnin cha jakhat hinghen lang, chule kum tampi hing hen, hitichun ahin nikhoho tamtah hihen lang, ahin ahinna chun thilpha-in lungkimna neihih hen, chule vui louvin jong umtaleh; keiman amapa sangchun aphat louva pen aphajoi kati.

⁴Ajehchu ama pannabei to ahung lutnin, chule muthim lah-a achemang tan, chule aminchu muthimin akhukhum ding ahi.

⁵Chukal valin aman nisa anamu pon, imacha jong anahe poi; aman khatjopa sangin olna akimu joh-in ahi.

⁶Henge, kum sangkhat nivei hing henlang, thilpha mu hihleh, mijouse abonchauva munkhatna checheh hilouham?

⁷Mihem tohgimna jousehi akamsung ding ahin, ahijeng vangin aduchat achim dehpoi.

⁸Ajehchu michingin mingol ho sanga ipi atamnei deh em? ahing nalaiho masanga kalsonje he-a vaichaten, ipi aneideh em?

⁹Gamtin ngaichat sangin, mitna mu joh chu aphajoi; hiche jonghi pannabei le lungthim kisuhgimna ahi.

¹⁰Aumsa chu minvosa ahitan, chule hichu mihem ahije ti akihen; ama sanga thahatjo toh ama kitet theihoi ahideh poi.

¹¹Pannabei punsah-a thil tampi akimudoh tolhonin, mihem dinga hichu ipiham aphat chomna?

¹²Ijeh inem itile mihem hinkhon nisa lim banga kitol mang loithei sung ajot laija, ama dia aphachom koijin ahetdoh ding ham? Ajeh chu ama athi nungle hiche nisa noija ipi ahungso ding koijin aseitheijem?