Read Thado Chin Thuhilpa 7 Bible Online

Thuhilpa 7 - Thado Chin bible

Thuhilpa 7

¹ Minphat hi thao mantam tah sangin aphajon; chule thi nikhohi pen nikho sangin aphajon ahi.

²Lunghemna in'a gachehi, golvahna in'a gache sangin aphajoi; ajehchu hiche chu mijouse hinkho kichaini ahin, chule ahing nalai chun alung sunga achin jing ding ahi.

³Hesohna hi nuina sangin aphajoi; ajehchu lunghemna melput vangin lungsung semphat cheh in aum jie.

⁴Miching lungsung chu lunghemna insunga aumin, ahinla mingol ho lungsung vang chu kipana inabou aum jie.

⁵Mihem dinga michingin mi aphona jah chu, mingol lasah kijah sangin aphachom jon ahi.

⁶Ajehchu mingol nuigin chu linga belto kikhot gin poh lenglung tobang ahin; hiche jonghi pannabei ahi.

⁷Tahbeh-in suhgentheina hin miching asungolin, chule nehguh thilpeh hin lungsung asusen ahi.

⁸Thilkhat kichaina chu akipatna sangin aphajoi; chule lhagaova thohhat chu lhagaova kiletsah sangin aphajoi.

⁹ Lunghang dingin nalungthima kino loihih-in, ajehchu lunghan hi mingol ho angsunga bou auma ahi.

¹⁰Tulai sanga malai nikho ho aphatjoh chu ipi jeh hintem, tin nangman seihih-in; ijeh inem itile nangman hiche chung changhi chingthei tah-in nakhol pon ahi.

¹¹Chihna hi gou kilo bangin dingin aphan; chule hiche jal hin nisa mute dingin phatchomna aume.

¹²Ajehchu sum hi kihon bitna ahibangin, chihna jonghi kihon bitna ahin; ahinla hetna achungchon na chu, chihna hin ama neiho chu hinna ape-in ahe.

¹³Pathen natoh hohi gah ngaiton, ajehchu aman akhonsa-a asem chu, kon ajansah thei dingham?

¹⁴Hamphat nikhon kipah thanomin, ahinla hahsat nikhole ngaiton; mihemin khonung leh amanunga imacha amudoh louna dingin, Pathen'in mihem khatjoh banga achom joh jong chu asem cheh ahi.

¹⁵Keiman pannabei nikhoho sunga hin imajouse kamusohtai. Midih khat achonphatna-a mangthah aumin, chule migilou khat agitlou vanga sottah hinga aumin ahi.

¹⁶Tamtah chunga kichon phatsah hih-in; chih jong kichihsah hih-in; ipidinga nangma nangle nang nakisuhset dingham?

¹⁷Phatlou bolval hih-in, ngoljong ngolval hih-in; ipidinga naphat masanga nathi jeng ding ham?

¹⁸Hichehi nangman nakimat khah a pha ahi; henge, nakhut jong hichea konchun loidoh hih-in: ajehchu amaho jouse lah-a kona Pathen ginga chu hungdoh teiding ahi.

¹⁹Khopi sunga um mithahat som sangin, chihna hin miching athahatsah jon ahi.

²⁰Ajehchu leiset chunga thilpha bolla, chonselou, midihtah khatcha aumpon ahi.

²¹Chujongle thu kiseiho jousehi abonchan ngaikhoh hih-in, ajole nasohpan nasapsetna kijah getnin nate.

²²Ajehchu chutobanga chu nangman jong midangho masapsetji chu nalung sungin ahe matchet jin ahi.

²³Hitiho jousehi keiman chihna-a kaphot chet ahitai. Keiman ching taveleng kanatin, ahinla chihna chu keija konin anagamla lheh-e.

²⁴Gamlatah-a um, chule hathuh-a thuh chu, kon amudoh jou dingham?

²⁵Hetna dingle kholchil nading, chule chihna holdohna ding le thilho umjedan holdoh nading, ngolna phatlou dan hetdohna dingle ngolna le lung chatvaina hetdoh nadingin, keiman kalungthim kana mangchan ahi.

²⁶Chule keiman alungsung Thangkol le Len ho ngen hia, chule akhut teni khaohol ho bangjeng, thina sanga khajo numei kamudoh-in ahi. Koi hileh Pathen lung lhaisahpa chu amanu-a kona hoidoh jouding, ahinla chonse vangchu amunun amat khahding ahi.

²⁷Veuvin, hiche hi kamudoh ahi, tin thuhilpan aseije: thil ahung kipat dan mudoh ahina dingin, khat khatnin kasimin;

²⁸Kahinnan ahol nahlai pentah chu keiman kamudoh poi. Sangkhat lah-a pasal khat kamudoh-in; ahinla amaho jouse lah-a chun keiman numei khat jengjong kamudoh poi.

²⁹Veovin, hibouhi kamu doh-e, Pathen'in mihem dihtah-a asem ahin, ahinla amahon semdoh thu tamtah aholdoh-un ahi.