Read Thado Chin Thuhilpa 8 Bible Online

Thuhilpa 8 - Thado Chin bible

Thuhilpa 8

¹Miching tobang ding koiham? chule thilkhat aledohna he-a koiham? mihem khatchu achihna-in amai avahsah-in; chule amai ngalna jongchu kikhel jengding ahi.

²Keiman, nangma kathumop nahi, Pathen'a nakitepna jalchun, lengpa thupeh chu chingtupmin.

³Amitmua kona chedoh dingin kikinsah hih-in; thilse-a pang teitei hih-in; ajehchu aman adeichan chu aboljeng ahi.

⁴Lengpa thu umna-a chun thahatna aumin; chule amahenga nangman ipi nabol ham tia seithei dinga koiham?

⁵Koi hileh ama thupeh nitchan chun thilse atolouding ahi; Chule michingpa lungthim chun phat le thu tanlhahna adatkhen theije.

⁶Thil kigong jouse-a dingin phat le thutanlhahna aumcheh-in, hijeh chun mihem hamsetna hi amachunga lentah in aumjingin ahi.

⁷Ijeh inem itile aman ipi ahung soding ahepoi; ajehchu itih phatna ahungso ding koijin ama aseipeh theidem?

⁸Lhagao henden na dinga lhagao chunga tha neija mihem koimacha aumpon; thi nikhon jong aman thaneina aneideh poi. Chule hiche gal kisat sunga jong chun ontholna aumpon; khangit louna-in jong chuche-a kipelut hochu ahuhdoh louding ahi.

⁹Hicheho jousehi keiman kamutan, chule nisa noija thil kibol jouse gelnan kalungsung kamangchan; mikhatnin ama le ama kisuh khahna dinga midang khat chunga thunei phat khat aumjin ahi.

¹⁰Hitichun keiman migilou akivui kamun, amaho chu munthenga kona hunglut uva potdoh-u ahin, chule amaho chu chutobang abolnao khopi sunga chun suhmilin aumun ahi. Hiche jonghi pannabei ahi.

¹¹Natoh phalou chunga thu kitanlha chu gangtah-a tohdoh-a aumloujeh-in, mihem chapate lungsung chu thilse boldingin kigojou depmin aumjin ahi.

¹²Michonse khatnin thilphalou jakhat veijen bolhen lang, chule ahin nikho kisaosah jongleh, Pathen ginga, ama anga gingkhen cha umho vang chun phatna amutei dingu ahi ti keiman kahei.

¹³Ahinla migilou dinga vang phalou helding ahi; ajehchu aman Pathen anga kichatna aneilou jeh-a, nilim tobang ahin nikhoho chu sao louding ahi.

¹⁴Leiset chunga pannabei ja kitongdoh thil aume; hichu mihem khat chu midih tah ahivanga, migiloute chunga thilsoh tobang achunga soh umin; chukitle, migilou tah ahivanga, michonpha te chunga thilsoh tobanga achunga soh aumin ahi. Hiche jonghi keiman pannabei ahije kati.

¹⁵Chujouvin mihemin aneh-a, adona, chule nomtah-a aum sanga phajo nisa noija aneilou jeh-in, keiman nopsahna kalheng jotai. Ijeh inem itile Pathen'in nisa noija apeh ahinkho lhumkeija, hiche hi atoh gimna-a umjing ding ahi.

¹⁶Keiman chihna hetna dingle, leiset chunga kin kitongdohho mun'a dinga kalungthim kimanchah phatnin; (ajehchu sun hile jan hijongle amitsing lou aume);

¹⁷Keiman mihem khatnin nisa noija na kitonga kona amudoh joulou, Pathen natoh jouse chu kamun ahi. Ajehchu mihemin tonggim tah-in holdoh ding go jongle, amudoh louding ahin, chukal valin; miching khatnin het dingin ngaito jongle, aman amudoh joulouhel ding ahi.