Read Thado Chin Thuhilpa 9 Bible Online

Thuhilpa 9 - Thado Chin bible

Thuhilpa 9

¹Ajehchu hitiho jouse hi gah phondoh jeng dingin keiman kalungin kagelin, michonpha te le michingho chule anatoh houchu Pathen khutna um ahin; mihem koimachan amaho angsunga thil umho jouse jal-in kingailutna hile kihotna hile ahedoh thei pouvin ahi.

²Thil jouse kibangin mijouse henga alhung cheh-e: michonpha le migilou chunga; apha chung le atheng chung chule athenglou chunga; ganlhai bolpa le ganlhai bol loupa chunga thilkhat alhung khom cheh-in ahi: michonse pa jong miphapa tobang ahin; chule akihahselpa jong kihahsel kichapa tobang ahi.

³Nisa noija kitongdoh jouse lah-a hin ase khat aumin, mijouse henga thilsoh khat aumin ahi: Tahbeh-in mihem chapate lungsunghi setna-in adimsetnin, chule ahinlai jengun jong alungsung uva lung chatvaina aumin, chujouteng amaho athiho henga acheji taove.

⁴Ahinla mihingho jousetoh kijopmat pa dingin kinepna aume; ajehchu uicha hingchu keipi bahkai athisa sangin aphachom jon ahi.

⁵Ijeh inem itile ahingho chun athidingu akihetnuve; ahinla athihon vang imacha akihet pouvin, amahon tohman jong anei tapouve. Ajehchu amaho suhmila um ahi taove.

⁶Chujongle tu-a hi amaho mingailutna, mihotna, chule mi mitthipna chu manga ahitan; Nisa noija kitongdoh thil ipi hileh, amahon a-imatih chana dinga chan anei louvu ahitai.

⁷Chen, kipah thanomin na an kineh inlang, chule lungnom selin nalengpi twi kidonin; ajehchu tun Pathen'in nanatoh ho asangtai.

⁸Naponsil ho chu bangleh jing jenghen; chule nalujanga jong thao lhasam hihhel hen.

⁹Pathen'in nisa noija napeh, pannabei nahinkho lhungkeijin, nangailu tah na-inneipi toh kipah thanomin chengkhom lhonin; ajehchu hichehi nahinkho sunga nisa noija nanatoh gimna-a nachan chu ahi.

¹⁰Ipi hijeng jongle nakhutnin tohdinga amaiphah chan chu, natha jesal teh-in tongin; ajehchu nangman najot jing lhankhuh asunga chun, tohding jong, tohgon jong, hetna jong, chihna jong aumtapoi.

¹¹Keima kahung kile kitnin, nisa noija kamudoh tai: kilhaitet jong alhai ajangkhaipa-a ahipon, gal kisat jong ahatpa-a ahipon, changlhah jong michang pa-a ahipon, haona jong hetthemna neipa-a ahipon, khohsahna jong khut thempa-a ahipoi; Ahinla abonchauva dinga phat le phatpha kitoh khaji ahibouve.

¹²Ajehchu mihemin ama phat akihet theipoi: thina thei lenthang giloutah sunga ngaho akimat bangle, vachaho thangkol sunga oh bangin; hicheho chu photlot louva achunguva achuhteng, mihem chapate chu phat phalouva a-ohji taove.

¹³Hiche chihna jonghi keiman nisa noija kamu ahitan, hichehi keidin sangtah abange.

¹⁴Khopi neocha khat ana umin, chule asunga jong mi lhomcha anachenge; chuin leng lentah khat hiche khopi dou dingchun ahungin, aumkim veltan, chule pal nasatah tampi atungdoh tai.

¹⁵Tun hiche khopi sunga chun mivaicha miching khat anaumin, amapan achihna jal-in hiche khopi chu ahuhdohtan ahi. Achuti jeng vangin koimachan chuche mivaichapa chu geldoh-in aneipoi.

¹⁶Hichun keiman kanaseije, chihna hi thahat sangin aphajoi; ahijeng vanginla mivaichapa chihna chu i-sah louvin anaumin, chule athuseiho jong ngaipeh louvin aume.

¹⁷Mingol ho lah-a vaihompa khosap awgin sangin, michingho thusei chu thipbeh chan akingaipeh jon ahi.

¹⁸Chihna hi galmanchah tampi sangin aphachomjoi; ahinla michonse khatnin thilpha tampi asusen ahi.