Read Thado Chin Solomon Labu 2 Bible Online

Solomon Labu 2 - Thado Chin bible

Solomon Labu 2

¹Keima Sharon pah le, phaicham ho-a lily pah chu kahi.

²ling le khaoho lah-a Lily pah bangin, chutobang chun kangainu chu nungah ho lah-a aume.

³Theithup thing gammang thinglah-a aumbangin, chutobang chun kangaipa chu golhangho lah-a aume. Keima alimnoija chun kipah tah-in katouvin, chule aga chu kateple alhum keijin ahi.

⁴Amapan keima nehkhom na ina eipuilutnin, chule kachunga apondal chu ngailutna ahi.

⁵Lengpitwi jin neilhon lang, theithup changhon neilung monin, ajehchu ngailut natna-a na-a kahitai.

⁶Akhut veilam kalu noija aumin, chule akhut jetlama chun eikoije.

⁷Vo nangho Jerusalem chanute, loulaija sakhigol anuho le achalho panna kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un.

⁸Kangaipa aw kajai! Veovin, ama molsang ho chunga kichom pumle, lhangho chopkhup pumin kaheng lama ahunge.

⁹Kangaipa chu sakhigol ahiloule sakhinou tobang ahi; ven, ama kabang tomuva adinge, bangkot ho-a konin aven, bang vangkah-a konin ahung khodah-e.

¹⁰Kangaipa chun thu ahin seijin, chule keima henga: hungthouvin, kangainu, keija dia melhoinu, hungpot dohtan.

¹¹Ajehchu vetemin, phalbi akichaitan, gojuh phat akichaijin chule kho aphatan ahi.

¹²Leiset chunga pahchaho ahung kilang doh-in, lasah phat ahung lhung tan, chule igam sunguva vahui ham gin akijatai.

¹³Theichang phung jong ahung gadohtan, chule lengpiguiho jong aga dongset toh agim namtuitah ahin pedoh tai. Thouvin kangainu, keidia melhoinu, hungpotdoh jengtan.

¹⁴Vo ka vakhu, songpi khikehkah le, songkol kalbi kidona mungil laiho-a chengnu, namaiso neimu sah inlang, na aw neijah sah temin, ajehchu na aw angeijin, chule namaiso jong amel lomin ahi, ati.

¹⁵Lengpilei suse-a sial ho, chule sial nouho neimatpeh un, ajehchu kalengpigui gahou adongset nalaijin ahi.

¹⁶Kangaipa chu keija ahin, chule kei ama-a kahi. Aman Lily pahho lah-a akelngoi hon avah-in ahi.

¹⁷Kho ahung vah-a, chule le-limho akitolmang kahsen, hung kiheijin, kangaipa, Bether mol chunga lhale sakhi chalgol, ahiloule sakhinou bangin hung umin.