Read Thado Chin Solomon Labu 3 Bible Online

Solomon Labu 3 - Thado Chin bible

Solomon Labu 3

¹Janle kajalkhun chunga keiman kalhangaipa chu kaholjin; ama kahol lelen, ahinla kamu joupon ahi.

²Keima, tun thouving ting, khopi sunga vahleng ting, kholai dung le lamlen ho-a kalhangaipa gaholinge, katin; ama kahol lelen, ahinla kamu joupon ahi.

³Khopi vil le-a khongah ho chun eimuvin, keiman ahenguva, keiman kalhangaipa nanamu uvem? tin kadongin ahi.

⁴Amaho themcha khatbou kagahkhel panbep nalaijin, keiman kalhangaipa chu kakimudoh paitai: keiman amapa chu eihinga kanu in, eina vopna indan sung kalhut kahsen katuh detnin kalhakang pon ahi.

⁵Vo nangho Jerusalem chanute, loulaija sakhigol anuho le achalho panna kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un.

⁶Meikhu khompi banga, myrrh le thao namtui gim namsela, sumkolvei pa thao namtui jouse pumma gamthipma kon hungdoh-a khu koiham?

⁷Veuvin, Solomon talai ahi; chuche kimvella chun pasal hangsan cheh somgup aumuvin, Israel lah-a ahangsan cheh ahiuve.

⁸Galsat themsa cheh ahijeh-un, abonchauvin chemjam akichoijun; Jan kichat tijatna jeh-in, amijousen achemjamu ataijuva akiko cheh-un ahi.

⁹Solomon lengpan Lebanon thingin, talai khat akisemin ahi.

¹⁰Aman akhom jouse dangka-in, alhong sana-in, chule achung khuse chu ponsandup min asemin, alailung chu Jerusalem chanuten dei umtah-in asemun ahi.

¹¹Vo nangho Zion chanute, potdoh unlang, ajinei nikho, alungsung kipa nikho-a anun lallukhuh akhuhpeh kikhuh-ah Solomon lengpa khu gaveovin.