Read Thado Chin Solomon Labu 4 Bible Online

Solomon Labu 4 - Thado Chin bible

Solomon Labu 4

¹Ven, kangainu, namel ahoije! ven, nahoilheh jenge, namai khuna pon kah-a namit teni vakhu mit abangin, nasam jong Gilead molsanga kona hungkumlha kel hon abange.

²Nahaho chu kelngoipi hon amul akivojoutil akisil joutil uva ahungpot doh-u toh abangun; amaho asohkop cheh ahiuvin, alah uva nouneilou khatcha aumpoi.

³Nane teni jong patsan abangin, nakam jong ahoilheh jengin; nadeh pang jong nasamlom lah-a kolbuthei uma abangin ahi.

⁴Na-ngong jong mihat ho lumdal sangkhat kikhaina, David'in galvon koinadinga asah insang abangin ahi.

⁵Na noi teni jong sakhinou ni pengkop, lily pah lah-a lhale abange.

⁶Kho ahungvah-a nilimho akitolmang kahsen, keima myrrh molsang lama chule bego molsanga gaum ingkate.

⁷Namel akilome, kangainu, natichung-ah nolnading ima aumpoi.

⁸Labanon'a konin chekhom hite, kajiholnu, Lebanon'a konin kilhon hite; Amana lhangvuma konin, Shenir le Hermon lhangvuma konin, keipi bahkaiho kul-a konin, chule lutnu molsang ho-a konin vetemin.

⁹Kasopinu, kajiholnu, nangman kalungsung nalajoutai; nangman namitna khatvei neihinvet le, na ngonga khivui khatna konin kalungsung nalajoutan ahi.

¹⁰Kasopinu, kajiholnu, nei ngailutna hi iti noptam! na ngailutna hi lengpitwi sanga iti phatjoh hitam! Nathao kinujol jong gimnamtui jouse sanga iti namtui joh-a hitam!

¹¹Vo kajiholnu, nane teni, khoiphanga kon khoiju tobangin ahung valhan; khoijule bongnoi naleigui noija aume; chule naponsil ho namtui dan Lebanon gimnamtui abang jengin ahi.

¹²Kasopinu, kajiholnu chu hon kiget khum ahin; twisam kiting, twinah kihuh ahi.

¹³Na thingphung ho jong kolbuthei hon, aga hoitah-a ga, ponlou namtui thing le thao namtui thing,

¹⁴Thao namtui le thing namtui, Aigeju le thingthal, begothing jouse toh; myrrh le aloe, chule anamtui penhotoh,

¹⁵Twiputna honleiho, hintwi twikhuh, chule Lebanon'a hungkona luidungho abang jengin ahi.

¹⁶Vo sahlam hui, khangin, chule lhanglam hui, hungin; kahon sunghi gimnam tuihon alosohna dingin hung nungin. Kangaipa chu ahon sunga hunglut henlang, atheiga hoitahtah hohi hung nehen.