Read Thado Chin Solomon Labu 8 Bible Online

Solomon Labu 8 - Thado Chin bible

Solomon Labu 8

¹Oh, nangma kanu noi hinchepma kapenpipa ana hitavele chun katitave! Pamlama kahinmu teng jongle kahinchop ding nahi; henge, i-sah louva kaumlou ding ahi.

²Keiman nangma kalamkaija kapui puiding eina hil jinga kanu insunga kapui lutding, ka kolbuthei twija kon kisem ju gimnamtui kadonsah ding nahi.

³Akhut veilam kalu noija aumin, chule akhut jetlama chun eikoije.

⁴Vo nangho Jerusalem chanute, keiman nangho kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un.

⁵Angainu chunga kingaija gamthipma kona hungdoh khu koi ahitadem? Theithup phung noija kathodoh nahi; chua chu nanun nanahin ahin, chua chu nahingnun nahin hindoh ahi.

⁶Suhdetna kinamkhum bangin nalungsunga neinam detnin lang, nabanna jong neinam detnin; ajehchu ngailutna hi thina bangin athaneijin, thangthipna jong lhankhuh bangin a-engse-e; amei chu meikong ahin, meikong nasa pentah ahi.

⁷Twi tamtah in ngailutna asudai joupoi, twisang lenho jengin jong alhoh joupoi; min ngailutna dingin a-insunga anei jouse pedohsoh jongle, ima-a simkham hilou lai ding ahi.

⁸Keihon sopi numeinu khat kaneijuve, amanun noi aneihih laije; amanu min ahungdoh nikho teng kasopinu diuvin keihon ipi kabolpeh tadiuvem?

⁹Amanu hi bang hitale, achunga leng inpi dangka-a kasah diu ahi. Chule amanu hi kotkhah hitale, cedar thingpeh-a katom dingu ahi.

¹⁰Keima bang kahi, chule kanoi teni jong insang tobang ahi; chuin keima ama mitteni-a lungmonna mu-a tobang kahung hitai

¹¹Solomon'in Baal-hamon'a lengpihon khat ananeijin; aman lengpihon chu angahho angansen; mitinin ahonsoh ga man dangka sangkhat cheh ahin pehlutdiu ahi.

¹²Kalengpihon keima angsunga aumme. Vo Solomon, nangma sangkhat nachan ding, chule aga ngahho chu jani changding ahiuve.

¹³Nangho hon leilaija chengho, golle paiten na aw angai juve hichu keijong nei jahsah-in.

¹⁴Hung kikinsah in kangaipa, gimnamtui molsang ho chunga chun nangma sakhi chalgol ahiloule sakhinou tobangin hung umin.