Read Thado Chin Isaiah 1 Bible Online

Isaiah 1 - Thado Chin bible

Isaiah 1

¹ Judah lengho Uzziah, Jotham, Ahaz chule Hezekiah nikholaija Judah leh Jerusalem chungchang thudolla, Amoz chapa Isaiah munei;

²Vo, vanho ngaijun, chule vo leiset, nana hinsungin. Ajehchu Pakaiyin thu aseitai: keiman chapangte chu kahinkhoukhah-a kahinseilet dohsah ahitan, hinlah amahon keima dounan na atong taove.

³Bongchal'in apu akihetnin, chule sanganin apun an apehna kong akihet-in; ahinla Israel'in vang ahepon, kamiten angaitopha himhim pouve.

⁴Ohe chonse nam mite, khansetna pohgihpo mite, thilsebol chilhahte, manthah sah chate; amahon Pakai chu adalhaovin, Israel dinga Mithengpa chu lunghan sahdin achoh thouvun, nunglama akitolmang taove.

⁵Ipidinga nangho kivoto jingjeng nalai nahiuvem? Nakisatto nahlai ding'uham? luchang apumin anatan, chule lungthim apumin acholtai.

⁶Kengto apat luchang geijin adamkom aumtapon; ahinla mapule kivodup, chule tina monsa ahin; amahon jenla ajen pouvin, tomla atom pouvin, thaojong anu pouve.

⁷Nagam sungu akamdeltan, nakhopihou jong meijin akihalha gamtai. Gamdang mihon nagamu na-angsung tah uva abahgamun, chule akamhelin, gamdang mihon alehkhuphel taove.

⁸Zion chanu chu lengpi leija buhcha bangle changmai leija buh kisong bang, khopi kiumkim vel tobang ahitai.

⁹ Janel Pakai chun amoh themcha khat eikhen louvu hileh, Sodom toh ibah uva, Gommorah dung isun jengdingu ahi.

¹⁰Sodom kho-a vaihomten, Pakai thuhi ngaijun! Gommorah mite nanghon i-Pathen'u danthupeh-a nanau hinsung uvin!

¹¹ Pakai chun, naganlhai nao hijatpihi keidia iphatsah naham? ati. Keiman kelngoichal govam thilto lhingset le gancha kivah thao tahtah kaneije. Keima bongchalho thisan hihen, kelngoinou ho thisan ahilouleh kelchate thisan'ah kalunglhaipon ahi.

¹²Nangho ka-angsunga nahung kilah tenguleh, ka inpi chonthanghoi dinga koiham nangai chaovah?

¹³Thilto pannabei ho chu hinchoikit tahih hel'un; gimnamtuijong keidia thet umtah ahibouvin; lhathah nikhoho le cholngah nikhoho chule khoppi kikouho jong kadou theipon, chujongleh khoppitheng kikouho jong gitlouna ngen ahibouve.

¹⁴Nalhathah nikhohoule naphat kitepmu kutho chu kahin nan ahot ahi. Eilunggim sahbep ahiuvin abonchan kapochim set tai.

¹⁵Chule nakhut nahin lhandoh tengu jongle, nangho-a kona kamit kaselding, tamtahvei taona hinnei jeng jongleu chun kangaipeh louding nahiuve; ajehchu nakhut hou thisan dimset ahi.

¹⁶Kisilthengun lang, kisuthengu vin; kamitmu-a konin nathilbol phalouhou chu koimang unlang; thilse bolda taovin,

¹⁷thilphabol kithemchuh-un, thu adih-a tanding gouvin, akibol gentheiho panpiuvin, panei loute thu tandih unlang, meithaiho seihuvin.

¹⁸Pakaiyin hitin aseije: tun hungun lang gelkhomu hite, Nachonset nao santhip bangjongle, buhbang banga bangding; sandup jeju tajongleh kelngoimul bangding ahi.

¹⁹Nangho nanop uva thu nangai ule, gamsung phatna chu nanehdiu ahi.

²⁰Ahinla nadaova nadeh uvangle, chemjam'a nalou gamdiu ahi. Ajehchu Pakai kamin aphondoh ahitai.

²¹Khopi tahsan umtah chu i-atile noti hungsoh-a hitantem! Thudih tanna anadimin, chonphatna analengin; hinla tun tolthat jeng ahitaove.

²²Nadangka thih eh asoh in, nalengpi twila twitoh kihal ahitai.

²³Napipui houla dou lungpu jeng ahiuvin, chule guchaho kiloipi ahiuve. Amitin-in pehguh angailuvin, chule kipaman del le ahiuve. Amahon panei loute thu atanpeh pouvin, meithaiho thujong atan diuvin ahengu ahunglhung khatapoi.

²⁴Hijeh chun janel ho Pakai, Israel dia mihatpa chun hitin aseije; Ahi! Keiman kakidoupi teho lhadoh ingting kamelmate phu kalah teiding ahi.

²⁵Keiman nachungah kakhut lam ingting, chule nathih eh chu thengtah a kalhah thenga, nasum lhahjol jouse kalah mangding ahi.

²⁶Chule keiman nathutan ho kaki ledoh sah-a, chule nathuhil ho jong akipat tilla banga kaumsah kitding ahi. Chuche joutengle chonphatna khopi, tahsan um khopi tia naki minvo ding ahi.

²⁷Zion chu athu kitanlha-a kilhatdoh ding, chule amanu kisihna chu chonphatna hiding ahi.

²⁸Ahin doumah bolteho le achonseho chu mangthah khomintin, chule Pakai dalhahho chu suhmang hela umdiu ahi.

²⁹Ajehchu nangaichatnu gangpi phungho chu ajachat piuvin, naki lhensao honlei chu nalungjinpi diu ahi.

³⁰Ajehchu nangho gangpido pulsa bangle, twi umlouhel honlei tobang nahi dingu ahi.

³¹Chule mihat chu saikhao nem bangintin, hiche sempa chu meisipah bangding, chutia chu kavam lhonding, koimachan aphelmit louding ahitai.