Read Thado Chin Isaiah 10 Bible Online

Isaiah 10 - Thado Chin bible

Isaiah 10

¹Ohe! ada ahiuve, adihlouva thu lhuhsahhole athu gonsao dihloutah a sun miho;

²Alhasamho thutanlhah dih-a kona hoidoh a, kami gentheite-a kona achanu suhchatvaipeh, meithaiho abahgam theina diule paneiloute chomding goho chu!

³Chule vilna nikhoteng chule gamlatah-a kona suhmangna hung nikhotengle ipipen naboldiuvem? Napanpi diu, koipen henga najam uva naloupi nao hoija nadalhah diuham?

⁴Keima beija amaho sohchangho noija kun uva, chule akithat ho noija lhumat diu ahi, Hicheng jouse jehhin alunghan abeidehpon, akhut alamjing nalaijin ahi.

⁵ Vo, Assyria, kalunghana moltum? akhut uva um tenggol khu kathangtomna ahi.

⁶Keiman kiphat lhemsah nam mite le kalunghana mite doudinga, chule thil suhchat vaisaho ladingle bahgam dinga, chule hicheho chu kholai bonlhoh banga chotpha dinga amachu kasolding ahi.

⁷I-hijongle aman chutobang chu atup ahipon, alungin jong chutin agelpon; ahinla namtin chu themkhat hilouva suhmang hel dinghi hiche-a alunggel chu ahi.

⁸Ajehchu aman aseije, kalengchapate chu abonchauva lengho hilou uham?

⁹Kalno chu Karchemish tobang hilou hija? Hamath chu Arpad tobang hilou hija? Samaria chu Damascus tobang hilouham?

¹⁰Kakhut hin amilim houho lenggam, Jerusalem le Samaria ho-a sanga nasajo ahin holdohtan;

¹¹Keiman Samaria le ahou milimhou kabolna banga chu, Jerusalem le amilim houho kabollou ding ham?

¹²Hijeh-a chu hunghiti ding ahi, Pakaiyin Zion molchungle Jerusalem chunga anatoh pumpi achai tengle, Assyria lengpa lung hoithona ga, chule akichungvet loupina-a chu talen kapeh ding ahi.

¹³Ajehchu aman, hetkhenna kathemjeh-a kakhut thahatna le kachihna a hichehi kanabol ahin, miho gamgi kachonpeh in, agou khollu kanachom in, mihangtah bangin achengho chu kanasonlhan ahi.

¹⁴Chule kakhutnin mite haona chu vacha buh bangin amudoh-in; chule min vacha tui kidalha alokhom bangin leiset pumpi kachom khom sohkei tai; Ahin alhaving hinjapma le akam ka-a avelhia jong khatcha aumpon ahi, ati.

¹⁵Heicha chu amangpa chunga kithang-at ngaijem? Ahiloule thing-at chu a-atpa chunga kichoisang ngaijem? Moltum chu adomsangpa khutna kon akithinlhah got banga, ahiloule tenggol chu thing hilou, adomsang beija akikhantou banga chu!

¹⁶Hijeh chun Pakai, janel Pakai chun, amithaote lah-a chun gonna solintin, chule aloupi na noija chun meikong bangin ama meijin konginte.

¹⁷Chule Israelte salvah chu mei hung hintin, mitheng chu meikonga hung pangding ahin chule hichun nikhatle lingle khaohi akahvama aval lhumding ahin;

¹⁸Chule gammang loupi nale agamphalai hinna le tahsa agoma asuhmanga, amaho chu ponlap dompa tha angoilhahpet bang hidiu ahi.

¹⁹Chule agam manga thing aumsun chu chapang lekha jih-in ajih kham bepma lhom hiding ahi.

²⁰Chule hiche nikholai chule hung hitiding ahi, Israel amoh chengsele Jacob insungmi asohchaho chu amaho sumangpa chunga kingaikit louheldiu Israel mithengpa Pakai chung joh-a dihtah-a kingaidiu ahitai.

²¹Amoh chengse Jacob mite amoh chengse chu Hat chungnung Pathen henga hungkilediu ahi.

²² Ajehchu nami Israelte chu twikhanglen neldi bangjongleu alah uva amoh chengbou hungkilediu ahi. Amangdinga umsaho chu chonphatna-a longletdiu ahi.

²³Ajehchu janel Pakai Pathen chun suhmangna ahinlhun sah ding hichu gamjouse lailung tah-a bol dinga agelhuh ahitai.

²⁴Hijeh chun janelho Pakai Pathen'in hiti hin aseije, Zion'a cheng kamite, Assyria ho chu kicha loujenun, aman Egypt mite abol banga chu moltum khatna navoh uva nachung uva atenggol alapsang ding ahi.

²⁵Ajehchu chomkhat kahlouva lung hilouna hi kichaija, kalungsatnahi amaho manthah na hiding ahi.

²⁶Ajehchu janel Pakaiyin Oreb songpi-a Midian ho athachaplai banga chu mivohna achothouva; chule amoltum twikhanglen chunga adopma, chutia chu Egypt'a banga chu adopsang ding ahi.

²⁷Chule hiche nikholai chuleh hunghiti ding ahi. Ama pohgih chu nalengkouva kona chule anamkoljon chu nangonga kona kilamang ding ahi. Chule thao kinujeh-a chu anamkoljon chu kisumang ding ahi.

²⁸Ama Aiath'a ahungin, ama Migron'a agalkaijin; Michmash'a apoh asekhomin;

²⁹Amahon lampi ajot galkaijun, amaho Geba'a ajangeh taove, Ramah ho akichan; Saul khopi Gibeah mite ajamtaovin ahi.

³⁰Vo Gallim chanu, awging tah-in samin, Laish lama kijahsah-in, vo khoto um Anathoth.

³¹Madmenah ho akichontan; Gebim'a chengho jamdingin akichomkhom taove.

³²Chuche ni chuleh ama Nob'a anaumden nalaijintin; Jerusalem lhang Zion chanu molsang douna-a akhut athin khum ding ahi.

³³Veovin, Pakai, janelho Pakaiyin tijat umtah a abah chu asatlhah ding ahin; adunglang sangtah kiphuh lhu-a, chule akiletsah kisunem ding ahitai.

³⁴Chule aman thih-a gammang thimletlut chu atuhlhuh-a, Lebanon chu mihat tah-a kona lhuding ahi.