Read Thado Chin Isaiah 11 Bible Online

Isaiah 11 - Thado Chin bible

Isaiah 11

¹ Jesse phungbula konin adon khat hungdoh intin, ajunga kona abahkhat hung khangdoh ding ahi;

²Chule Pakai lhagao chihna le hetkhenna lhagao, thumopthem le hatna lhagao, hetnale Pakai ginna lhagao achunga hung chuding ahin;

³chule amachu Pakai ginna-a hetna gangtah asem ding, chule amitna amubanga thu atan louding, anakhanga ajahbang maimaija jong aphosal louding ahi.

⁴ Amavang chonphatna-a vaichate thu atanding, leisetna mi nunnem te chu dihtah-a aphoding ahi. Chule aman leiset hi akamsung molla ajepma migiloute chu akam hu-a athading ahi.

⁵ Chonphatna chu akonggah hintin, kitahna chu alunggil gahna hiding ahi.

⁶ Ngeile kelngoinou chengkhom intin, lutnu chu kelnoutoh kolkhom ding ahin; chule bongnoule keipibahkai gol chule gan kivahthaoho lhakhoma; chapang neuchan apuilediu ahi.

⁷Chule bongpile vompi kivahkhomintin; anouteo kolkhom ding ahin; chule keipi bahkai jengin jong bongchal banga changpol ahin nehding ahi.

⁸Nao noicheplai gulse ko kotna kichema, noichep bang naosen in gulsum kosung asoding ahi.

⁹ Amaho kalhangthenga chu kisukha louhel le kisumang louhel ding ahiuve. Ajehchu twijin twikhanglen akhusoh banga leiset hi Pakai hetna-a dimset ding ahitai.

¹⁰ Chule hicheni chule Jesse jung hung umdoh intin; hichu mitin melchihna dinga hung dingdoh-a, chidang namdang hon ahinholdiu ahi. Chule acholdona chu loupitah hiding ahi.

¹¹Chule hicheni chule hitiding ahi, Pakaiyin amite amoh chengse, akidalha dingho, Assyria'a kon Egypt, Pathros, Kush, Elam, Shinar, Hamath'a kon, twikol gamho-a kona lakit dingin aniveina-a akhut alhankit ding ahi.

¹²Chule namtin vaipi dingin aman melchihna tungdoh intin, Israel nodohsa ho achomkhoma, chule leiset ningli-a kona Judah mi kithecheh ho chu akhopkhom ding ahi.

¹³Ephraim mite thangsetna jongchu kitol manga, Judah te douho chu kisatlha ding, Ephraim min Judah thangset dantin, Judah'in jong Ephraim sutan taponte.

¹⁴Ahinla amaho lhumlang sanga Philistinte lengkouho chunga leng uva, kigomuva solam miho achom dingu ahi, amahon Edom le Moab chunga akhutnu alhah uva, chule Ammon chaten amaho thu angai dingu ahitai.

¹⁵ Chule Pakaiyin Egypt vadunglen Lei [2] chu asuh manghela chule huipi hattah-a luipi chunga akhut athinkhuma, luidung sagiho chu ajepma, chutengle achunga chu mihon kengto kot louva lam ajot dingu hi.

¹⁶Chule Egypt gama kona ahungdoh niuva Israel ten lampi ahin jui banguva; amite amoh kidalha ho dinga chu, lamlhongpi khat Assyria'a kona hungki lhung ding ahi.