Read Thado Chin Isaiah 13 Bible Online

Isaiah 13 - Thado Chin bible

Isaiah 13

¹ Babylon pohgih, Amoz chapa Isaiah'in amuchu ahi.

²Milalte kotpi phunga aluttheina diuvin, molsang chunga chun ponlap domsangun lang, awsang tah-in sam unlang, khutnin japmun.

³Kathensosa mihochu thu kapen, Kalunghana-a dingin kamihat ho jong kakouvin, kaloupina eikipapiho jengjong kakouve.

⁴Molchunga mitamtah husan chu mipi nasatah husan tobang ahin; namtin lengam kikhomkhomho kinah kisao husan toh abangin ahi. Janel Pakai chun galmi janel ho chu galmuna din akhomtup tai.

⁵Amaho gamlatah gama kon, van monga konin, Pakai amatahle lung hilouna manchah hotoh chuche gampumpi sumang dingin ahunguve atiuve.

⁶ Penguvin, ajehchu Pakai nikho chu ahungnai tai; Hatchung nunga kona manthah na tobang chu hunglhung ding ahi.

⁷Hijeh-a chu khut jouse ngoilha-a mitin lungsung junlhading ahi.

⁸Chule amaho kichaovintin; natna le lungkham na-in manchom untin; numei naosonat thoh banga thohgima umdiu amaho khatnin adang chu adatmouva, amaiju meikong bangjeng ding ahiuve.

⁹Vetan, Pakai nikho lunghanale lungsatna khohtah toh kithokhom engsetna, chuche gam sugamhel dingchu ahunglhung tai. Aman chuche-a kona michonseho chu asuhmang helding ahi.

¹⁰ Ajehchu van'a ahsi ho le chua bombel ho chun avah-u apehtahloudiu, nisa chu asodohna-a thimdeldul jengding ahitan, chule lhavah injong avahchu asalvah louding ahitai.

¹¹Chule keiman vannoihi asetnao jeh-a chule migiloute chu akhansetnao jeh-a talen kapeh ding; mikiletsahho ahoithanau kasuhbei ding, chule kiletsahna tijat umtah chu nemcha kakoipeh ding ahi.

¹²Keiman sanatheng sanga lujo mihem khat, Ophir sanahal sanga lujohel mihem khat kasemding ahi.

¹³Hijeh-a chu janel Pakai lunghan ni-a alungsat khohtah nikho chule vanho kaho lingsoh-a, leiset jong amuna kona kichondohding ahi.

¹⁴Chule hichu sakhi nung kidel bangle, ahoitupbei kelngoi tobang hiding ahin; mitin chu amaho mite cheh lama, kiheija, ama gamcheh-a jamlutdiu ahi.

¹⁵Koihile akimudoh chanchu kidot kamhel helding, chule amaho jopchan chu chemjam'a loudiu ahi.

¹⁶Achateu jong amitmu tah uva kichil ngema a-inho kichom theng ding, chule ajiteu jong achamlou uva kisusedingu ahi.

¹⁷Vetan, amaho doudin Mede mite tildoh ingting, amahon dangka angaisah loudiu; chule sana-a jong kipahlouding ahiuve.

¹⁸Athalpihou chun gollhangho hinkaplih untin; laigil gaho chunga khotona himhim aneilou diu; amitmuva naosen ho jong akheh louheldiu ahi.

¹⁹ Chule Babylon lenggam ho loupina Chaldea mite melhoina chungnung chu Pathen'in Sodom le Gomorrah asuhmang tobang chu hiding ahi.

²⁰A-itih a jong koima cheng talouhel ding, akhang akhanga jong chengkit talouhel ding. Arab miten jong chuche munna chu apon innu asonloudiu; kelngoi chinghonjong chua akelngoi hongu asemlouheldiu ahitai.

²¹ Amavang nelgama gamsaho chua chu koldiu; a-inhou chu kichat um ganhingho dimsetna; sumbupi ho chua chu chenga, lhomiho hunglam diu ahi.

²²A-in homhou sunga chu twikol gamsaho chule aleng in nomhou sunga chu Dragonho hung hamdiu ahin; chule amanu phat hunglhun nading chu anaitan, anikhoho jong kijopsao talouhel ding ahi.