Read Thado Chin Isaiah 14 Bible Online

Isaiah 14 - Thado Chin bible

Isaiah 14

¹Ajehchu Pakaiyin Jacob hepintin, chule Israelte chu lheng nalaijintin, agamsung tah uva achensahdiu chule gamdang mihon amaho ahinjopmuva, Jacob insunga behdiu ahitai.

²Chule mihochun amaho ahinpuijuva, apate mun ahinlhut ding, chule Israel insung chun Pakai gama amahochu sohpale sohnu-a avuluva; chule gal hinga akaihouchu gal hinga akaijuva; asugentheiteu chunga chu vai ahomdingu ahi.

³Chule nalungkham na-a konle nakichat na-a kona chule soh suhgenthei natoh hahsa naki tohsah na nasohchanna-a kona Pakaiyin nacholdosah nile hung hitiding ahi.

⁴Chutia chu nangman Babylon lengpa douna-a hiche thuchih hi naman chah-a naseiding ahi. I-atileh misugenthei pa chu iti beija hitam! sana khopi chu kichai hitam!

⁵Pakaiyin mikhang giloupa tenggol le vaihomho laltengdop chu aheboh pehtai.

⁶Miho lunghanna tanlouva veijingpa, lungsa tah-a namtin chunga vaihompa chu bolgimin aumin, koimachan asutangpoi.

⁷Leiset pumpi akicholdon, athipdeltan; amahon la asadoh-uvin ahi.

⁸Ahi, nachunga chah thinghole Lebanon'a cedar thingho akipah-un, suhlhah-a na-uma patnin eiphuh lhudiu khatcha kahenguva ahungtapoi, atiuve.

⁹Noilama konin thikholkhul chu nahunglhun lamdot dingin ahung kichonnin; hichun nangma dingin mithihole leiset pipui jouse jong achoh thouvin; namtin lengho jouse alaltounaova konin akaithou tan ahi.

¹⁰Amahon nahenga, nangjong keiho banga nahung lhahsam hitam? keihotoh nahungbah hitam? atidingu ahi.

¹¹Naloupina le naselangdah husa chu lhankhuh-a poh lhah-in aumin; lungtol chu nanoija akiphan, hiche lung chun natomchah tan ahi.

¹² Vo Lucifer, jingkah chapa! van'a kona iti hunglhahmanga nahim! namtinho hatmosahpa chu leisetna iti nahung kisatlhah jeng hitam?

¹³ Ajehchu nangin nalungsunga keima van'a kaltouving ting; Pathen ahsi ho chungvuma kalaltouna kidopsanging katin; mipi kikhomho lhangchung sahlam sanga touving kate, natin ahi.

¹⁴Meilhang ho chungvuma kaltouving katin; chungnung penpa toh banging kate, nanatin ahi.

¹⁵Ahinla nangma kotongthuh lama thikholkhula kipui lhading nahijobouve.

¹⁶Namu jousen neochan namuvintin, leiset kithinsah-a lenggam ho hotlinga ngaito-a chu hiche mipahi hijaham? tin ngaitouvinte;

¹⁷Amachun vannoihi gamthip banga asema, chule akhopihou sumanga sohchangho in honpehlou chu hiche mipahi hilouham? atiuve.

¹⁸Namtin vaipi lengho jouse abonchauvin, ama ama insungcheh-a loupitah-in alum ihmuvin ahi.

¹⁹Ahinla nangma thet umtah abah khatna hungkon chemjam'a kisatlih, akithatsaho ponsil, kokhuh-a songho lah-a kipailha, kenga kichonpha thilong bangin, nalhana konin paidoh-in na-umtan ahi.

²⁰Nangin nagam nasuhmanga, namite nathagam jeh-in, amahotoh nakivuitha louhel ding ahi. Khanset bolho chilhahte chu kiminphah kitlouhel ding ahiuve.

²¹Amaho akipatdoh lounadiule, gam alo lounadiu, leiset chung khopiho achendim louna diuvin apateu khansetna jal-in achateu chu thagamdin gotan.

²²Ajehchu janel Pakaiyin amaho dounan kipat ingting, Babylon'a konin kachapa le katupa amohchengse minchu kasuhtan ding ahi, ati, tin Pakaiyin aseije.

²³Keiman vakang chenna mun le twikulho-a kasema, manthah na muntheh-a katheh doh ding ahi, tin janel Pakaiyin aseije.

²⁴ Kangaito bang banga guilhunga, kagon bang banga ding teiding ahi; tin janel Pakai chu aki hahselin aseitai.

²⁵Chutia chu keiman kagamsunga Assyria mite kasuhmanga, kamolsangho chunga kachotpha ding; chujou tengle anamkoljon chu amaho-a kona kiheimanga, apohgih-u alenguva kona aselhah dingu ahitai.

²⁶Hiche thilgonhi leiset pumpi chunga thilgon ahin; chule hichehi namtin vaipi jouse chunga kijahdoh khutchu ahi.

²⁷Janel Pakai gonsa ahin, koiham ajahda dingah? Chule akhut kijahdohsa chu kon atimsahkit dingham?

²⁸ Ahaz lengpa thi kum-a chu hiche pohgih hi uma ahitai.

²⁹ Nangma kivohna mol abohtah jeh-in, nang Palestine pumpi kipah hih-in, ajehchu gul sonna kona chu gulsum hungsoh-a, chule ama guchu meija lengthei gul hunghi ding ahi.

³⁰Chutengle migenthei cha pengmasa kivah intin, milhasam mongtah-in lumintin; najung chu kella katha-a, nami amoh chengchu aman athading ahi.

³¹Vo kotpi samin; vo khopi pengin; nangma Palestine pumpi najun lhatai. Ajehchu sahlama kona meikhu hungdoh-a; aphattep sunga chu koimacha achanga umlou ding ahi.

³²Nampi thupole ho chu khatnin iti adonbut dingham? Pakaiyin Zion aphutdoh tan, hijeh-a chu mivaichaten hichu atahsan dingu ahi.