Read Thado Chin Isaiah 16 Bible Online

Isaiah 16 - Thado Chin bible

Isaiah 16

¹Gamsung vaihomho dingin, Sela a konin, gamthip lam Zion chanu lhanga chun kelngoinou ho chu hinsolun.

²Chutia chu Moab chanute chu vacha abuh-a kona kinodoh leng lele banga, Arnon kaimuna chutidiu ahi.

³Thumop unlang, thutan boldoh-un; sunkim laija nalelim chu jan bangin seminlang; akinodohsa selinlang; vahvei chu matsah hih-in.

⁴Akinodohho chu chenkhompin, Moab misumang pa maija akiselnao hitan, hunama lapa chu akichaija, migamsah pa akingah jehchun gamsunga konin misugenthei ho akisumang tai.

⁵Chule hepina-in laltouna chu kitungdet nintin, hiche chunga chu thudih-a David ponbuh sunga vai ahomding, thu atanding, thutana dih aholding chule chonphatna-a kinoding ahi.

⁶Moab hoithonahi thu kanajaovin; ama ahoitho lheh jengin; akiletsah nale ahoithona chule alunghan naho jengjong kanajaovin; ahinla ajounaho chu chutilou dingdol ahi.

⁷Hijeh chun Moab pengjah hen, mitinin Moab ka cheh hen. Ajehchu Kirhareseth kiphudoh jala nalunghempiu; amaho chu akivolhu tahmonga ahiuve.

⁸Ajehchu Heshbon loujao le Sibmah lengpigui alhasamtai, aphung lhungpiho chu Pathen hephalou pakai hon anasubongun, Jazer alhung taove. Chuin gamthip lailunga ajamle leuvin ahi. Abahho ajamdoh un, twikhanglen galla ajamgalkai taove.

⁹Hijeh chun Sibmah lengpigui chu Jazer chunga kana bangin kacham-inge; vo Heshbon le Elealeh kamitlhi-in twichap nange; nanipi lai theiho dingleh nachang at nadinga khosap chu athip tai.

¹⁰Chule lou phatah-a kona kipanale thanopna akilamang tan; lengpilei laija penga lasah le khosap jong umlou ding ahitai. Achilhon jong lengpitwi achildoh loudiu ahitai. Alengpiga lonao khosap jong atansahtai.

¹¹Hijeh chun kagiljang hohi Moab te dingin, chule kasung hohi Kirhares dingin selangdah bangin ging'inte.

¹²Chule hitiding ahi. Moab chu munsanga alungkham akimutengle munthenga tao dingin hungintin, hijongle lolhing louding ahi.

¹³Hichehi Pakaiyin chuche laija patna Moab chungchang thu aseichu ahi.

¹⁴Ahinla tun Pakaiyin ana seijin, natongho kumsim dungjuija, kumthum sung Moab loupina chu amipite tamtah puma kinoise ding; amoh umsun chu lhomchale doitah hidiu ahi, ati.