Read Thado Chin Isaiah 17 Bible Online

Isaiah 17 - Thado Chin bible

Isaiah 17

¹ Damascus pohgih veuvin, Damascus hi khopi khat ahina-a konin akilamang tan, in-gem kiselom hunghidingbou ahi.

²Aroer khopichu dalhah-in aumtan, kelngoihonte kolna ding maimaibou hung hintin, koimachan akichatsah loudiu ahi.

³Ephraim'a konin kulpidet beijintin, Damascus'a lenggam le Syria amoh chengjong beiding ahitai. Amaho chu Israel chate loupina tobang hidiu ahi, atin janel Pakaiyin aseije.

⁴Hicheni chule hitiding ahi. Jacob loupina chu kemsuh-in tin, chule atahsa thaotah chu jol lha-a gongding ahi.

⁵Hiche chu chang atpan changho ahuikhom, akhutna changvuiho a-at banga Rephaim phaichama changvuiho alokhom tobang hiding ahi.

⁶Ahinla olive thingphung kihotlinga, abah sangpen tah vuma aga nile thum umdenna, abah ga phapena lile nga umden bep banga lengpigui kidalha ding ahi, tin Israel Pakai Pathen'in aseije.

⁷Hicheni chule min asempa ahinvet ding, chule amitnin Israel mithengpa chu ajabol ding ahi.

⁸Chule aman amakhutsem maicham ho chu avet tahlou ding, akhutna asemsa thingbomho hihen, milimho hijengjongle, ajaboltah louhel ding ahi.

⁹Hicheni chule akhopi dettahho chu thingbah kidalha Israelte jeh-a abah chungnung pen adalhah-u tobang hiding ahin, hikom chu kamdel ding ahitai.

¹⁰Ajehchu nahuhhingpa Pathen nasumilin, nahatna songpi nageldohtapoi. Hijeh chun thingkeh hoihoi kiphun natin, hetkhah lou kiselhuhna koijinate.

¹¹Naphuni maman khandohsah in natin, natu jingkah mama chun khantul tulsah-in nate, ahinla aga lokhomchu lungkhamna kisekhomle lungdon ngahnabei hiding ahi.

¹²Mipi tamtah twikhanglen kitumging banga ahusao kitol guiguile, twipi kinong lullul banga kinonga, namtin kinongho chu ohe adau ahi!

¹³Namtin vaipi chu twipi kinong tamtah bangin kingong untin, hijongle Pathen'in amaho phoh intin, amaho gamlatah-a jamdiu; chule lhanga huipin changsi amutlonle bangle chimpei masanga thil kipeimang bangdiu ahi.

¹⁴Chule vetan nilhah lamle lungkhamna ahijin, jingkah masangin ama anaumjitapon ahi. Hichehi eisuchavai hou chanchu ahin chule eigumang hou vangchan chu ahi.