Read Thado Chin Isaiah 19 Bible Online

Isaiah 19 - Thado Chin bible

Isaiah 19

¹ Egypt pohgih chu veuvin, Pakai chu mei kitol gangtah chunga touva, Egypt gama hungding: chule ama angsunga Egypt gama milim ho chu kichon diu, Egypt mite lungchang chu asunga jun lhading ahi.

²Keiman Egypt mite doudin Egypt mite ma tilingting, amitakipmin asopi adoudiu, amitakipmin aheng akom adouva, khopile khopi, lenggamle lenggam hungkidouto diu ahi.

³Hichesung chule Egypt mite lhagao chu hungthon nintin, chule hilchahna chu kasuhbei ding ahi. Chutengle amahon milimho le ailhimho, lhakou ho le doithemho henga aholdiu ahi.

⁴Chule keiman Egypt mite chu vaipo engsetah khat khutna kapehdoh-a; kichat umtah pakai khatnin achunguva vai ahomding ahi; tin Pakai janel Pakai chun aseitai.

⁵Chule vadunglen ho-a kona twiho hungkanga; vadungho longmanga gothetding ahi.

⁶Chule amahon vadunglen ho chu gamlatah-ah heimang untin, kinga tupna luidunga chu kanga gothet ding: Pumpeng hole aigeho jong golha ding ahi.

⁷Luidung pang le vapangho akeova kijamding; chule luidung panga kithe chanchu golha-a huija lengmang ding; umkit louhel ding ahitai.

⁸Ngamanho jong lunghemuva, luidung ho-a ngakoiho jouse lunghem untin; chuhtwi chunga lensep ho lhasamdiu ahitai.

⁹Hiche chungchon chun tupat pon khongho le ponvang khongho chu lungjing diu ahi.

¹⁰Akibulphuna songho kisubong ding; natong dinga kigongho jouse jong lungjinga umdiu ahitai.

¹¹Thonlouva Zoan lengchapate chu ngoldiu; Pharaoh thumopthem michingho thuhil chu lungsetna neilou ahung hitai. Keima miching cha leng luiho chapa kahi tia, Pharaoh henga iti naseiju ham?

¹²Amaho hoilamba hitaovam? namichingho hoiba hitaovam? Amahochu tun kihilsah inlang, Egypt chunga janel Pakaiyin ipi agon chu amaho hetsah in.

¹³Zoan lengchapate chu angoltaovin, Noph lengchapate akilhemlha gamtai; amahon jong Egypt mite, chuche phung mite chendetnaho geijin apuimanguve.

¹⁴Alah uva chun Pakaiyin lamvaina lhagao achoh halin; chutichun jukhama alohna-a lonlele bangin Egypt mite chu atohnao channa asuhkhelsah uve.

¹⁵Egypt dingin alu hihen amei hijongle, lusu bah hihen phaipheng phung hijongle, abolpeh theiding aumpoi.

¹⁶Hicheni chule Egypt chu numei tobang hidiu ahin; janel Pakai khut thin chu achunguva athin ahijeh-a kichaova tijading ahiuve.

¹⁷Chule Judah gamchu Egypt tedin tijat umtah hintin, chuche douna dinga janel Pakaiyin agontoh athuhiljeh-a aminphah chu kichacheh diu ahi.

¹⁸Hiche nikho chule Egypt gama khopi nga in Kanaan pao athouva, janel Pakai henga chu kihahsel ding ahiuvin; khatchu manthah na khopi kitiding ahi.

¹⁹Hicheni chule Egypt gamlailunga chu Pakai maicham khat, chule agamsunga chu Pakaiya songphu khat umding ahi.

²⁰Chule Egypt gamsunga janel Pakai dinga hichu melchihna le hettohsahna hiding ahi; ajehchu misugenthei ho jeh-a Pakai henga taoding ahiuvin, chule aman huhhingna le hat chungnung khat ahinsolpeh-a, amahochu ahuhdoh ding ahi.

²¹Chutengle Pakai chu Egypt ho het hitantin, hiche nikho chule Egypt ten Pakai chu ahetdohdiu, chule ganlhaina le thilpeh aneidiu ahi; ahi, Pakai henga kitepna khatna kitep uva asuhbulhitdiu ahi.

²²Chule Pakaiyin Egypt ajepding, ajepna-a asuhdam ding ahi. Amaho Pakai hengtah-a chu hungkileuva, chule aman ataonao angaipeh-a, chule aboldamdiu ahi.

²³Hiche nikho chule Egypt'a kona Assyria geija lamlhongpi khat umding Assyria te Egypt'a, Egypt Assyria a, hunguva Egypt mite chun Assyria mite toh ajenkhomdiu ahitai.

²⁴Hiche nikho chule Israel hi Egypt le Assyria bana athumna hiding, chule gamlailunga phattheiboh changtah hunghi ding ahi.

²⁵Janel Pakai chun kami Egypt te leh kakhutsoh Assyria te chule kagoulo Israelte chu phattheiboh changu hen tia aseiding ahi.