Read Thado Chin Isaiah 2 Bible Online

Isaiah 2 - Thado Chin bible

Isaiah 2

¹Amoz chapa Isaiah'in Judah le Jerusalem chungchang thudol chu anamu.

²Ninunung lamle hitiding ahi, Pakai inmun molsang chu molsang chung vum ho-a hung kiphutdoh ding ahin, lhang vum ho-a kichoisanga; chutengle namtin vaipi chu kijotlutdiu ahi.

³Hiteng chule chitin, namtin hunguva hitia aseidingu ahi; hungun Pakai Molsang chunga kaltouvu hitin, Jacob Pathen inna chun cheu hite; chutia chu aman alampi thudol eihil uva, ama lampia chu ichediu ahi, tiuvinte. Ajehchu Zion'a kona dan thupeh le Jerusalem'a kona Pakai thuchu hungpotdoh ding ahi.

⁴ Chutia chu aman namtin vaipi kah-a thu atana, mitamtah aphosalding; amahon achemjamhou loukaina, chule atengchahou kangkuija akikhendiu; namkhat douna-a namkhat nin chemjam lamtalou ding, galbolje jong kijilna umlou ding ahitai.

⁵Vo Jacob insung miteho, hunguvin, Pakai vah-a chun cheleu hite.

⁶Ajehchu nangman nami Jacob insung chu napaitai, ajehchu amaho solam mite chona dimset ahiuvin, Philistine ho bangin gaothu aseijun chule gamdang mite chate toh kipa thanop abolkhom jiuve.

⁷Agamujong sanale dangka adimsetnin, chule agou khol hou jong angahna bei ahin; agamsungu jong sakol adimset'in, chule asakol kangtalai hou jeng jong akichaitih aumpoi.

⁸Agamsung jong milim semthu adimsetnin; akhut tah uva aboldoh-u akhutjung ngeijuva asemsao chu ahouvun ahi.

⁹Milham hon chibai aboh-un, milen ama le ama akisuneovin, hijeh chun ngaidam changlou diu ahi.

¹⁰ Thahat tah Pakai ginna le alal loupi masanga chun songko sunga lutning lang leivui lah-a gakiselin.

¹¹Mihem kivetsangna chu kisunem intin, mihem kiletsahna chu kisulha ding, chule Pakai changsehbou chuche niteng chule choisanga umding ahi.

¹²Ajehchu ahoithole akiletsah chan chule akichoisang chan chunga chu janel Pakai nikho hunglhung ding, chule amaho chu kisunem ding ahi.

¹³Lebanon Cedar thingsang hole adoh sangho jouse chung le Bashan gangpiho jouse chunga,

¹⁴molsang ho jousele lhang kichoisangho chunga,

¹⁵in-song sangtin hole galpal kikaiho chunga,

¹⁶Tarshish kong inneiho jouse chungle, khutthem kisem thilho jouse chunga hunglhung ahi.

¹⁷Chule mihem kichoisang nachu kisulhantin, mihem kiletsahna chu kisunem ding ahi. Chule chuche ni chule Pakai changsehbou choisanga umding ahi.

¹⁸Chutengle semthu milimho jouse asuhmanghel ding ahi.

¹⁹Tijat umtah a leiset hotling dinga akipatdoh tengle, Pakai ginjehle alal loupina jeh-a, amahochu songpiho kohomsung le leikoho sunga lutding ahiuve.

²⁰Hicheni chule mihon adangka milimhou le asana milimhou, ama ama houding cheh-a akisem houchu, bui hole bah ho henga ahinse manguva,

²¹tijat umtah-a leiset hotling dinga ahung kipatdoh tengle Pakai ginjehle alalna loupijeh-a songpiho khikeh sungle songpiho pohkeh sunga chu lutdiu ahi.

²²Mihem anah-a hai maimaipa-a konin kikangseuvin, ajehchu ama ijapang dingham?