Read Thado Chin Isaiah 21 Bible Online

Isaiah 21 - Thado Chin bible

Isaiah 21

¹Twipi nelgam pohgih, lhanglam chimpei hungkipei bangin chutichun nelgamle tijat umtah gama konin ahunge.

²Lungkham umtah thilmu khat kahenga akiphongin, kitahlou bolpan kitahlouvin abolin, misumang pan mi asumange. Vo Elam kaltouvin, vo Media gaum kimvelun, khoisatna jouse kasuhtang ahitai.

³Hijeh chun kataihohi natna-in adimin; numei naosonat in aheh bangin, natna chun eiman chomtai. Hichu kajan kakunin kho mutheilou jennin kalungkhamtan ahi.

⁴Kalungsung ahaisamtan, thil gimneitah khatnin eikichat sahtai. Kanopna janchu aman kadingin kichatnan aleheitai.

⁵Dokhang chu dovin, daiveina insanga chun ve jingin, neuvin, donun; kipat un, nangho pipuiho, lumdal chu thao uvin.

⁶Ajehchu hitihin kajah-a aseijin, Pakaiyin kahenga, chen, khongah khat koijin amu muchu phondoh sah-in ati.

⁷Chuin aman kangtalai khat sakola tou mi kopkhat toh, sangan kangtalai khat, sangongsao ho kangtalai khat amun, chuin gunchu tahle lunglut tah in angaijin ahi.

⁸Chuin ama keipi bahkai bangin apengin, Pakai keima insang chunga kading jingin, chule jankhovah in kapansatna-a kaume.

⁹ Chule vetan, hiche munahin miho kangtalai khat, sakol chungtou kopkhat toh ahungin ahi. Chuin aman ahindonbut nin, Babylon achimtai, achimtai, amanu pathen semthu milim jouse aman tolah avobong gamtai, ati.

¹⁰Vo kachang mola kavohsa kaphola kachang ho, Israel Pathen, janel ho Pakaiya kona kanajah chu naheng uva kaphondoh ahitai.

¹¹Dumah pohgih chu, Aman Seir'a konin eihin kouvin, khongahpa, jana ipi soh am? Khongahpa jana ipi soh am? ati.

¹²Khongahpa chun jingkah, chule janjong ahung naitai. Nakholtoh nomule kholtoh-un, hungkileuvin, hungun, ati.

¹³Arabia te pohgih chu, Vo Dedanim kholjinho, nangho Arabia gammang sunga nagedingu ahi.

¹⁴Tema gama chengho chun adangchahpa twi ahindop peh-un, galjampa chu amahon changlhah-in avah uve.

¹⁵Ajehchu amaho chemjam'a kon, chemjam kisatdohsa-a kon, chule thalpi kijebongsa-a kon, chule gal nasatah-a kona hungjam ahiuve.

¹⁶Ajehchu Pakaiyin kahenga hitihin aseije; kithalah kumho dungjuija kumkhat sunga Kedarte loupina jouse beisohding ahi.

¹⁷Ajehchu Kedar chate thal kapthem le galhat hochu kilhomsah ding ahi. Ajehchu Pakai Israel Pathen'in hichehi aseisa ahitai.