Read Thado Chin Isaiah 22 Bible Online

Isaiah 22 - Thado Chin bible

Isaiah 22

¹Thilmuna phaicham pohgih. Tu-a ipi hahsatna uma, in chunga nabon chaova nakalu hitam?

²Nangma husagin na dimset, khopi pohcheichoi, kipahtah khopi; napasal kithat ho chu chemjam'a kithat le galsatna a thi ahipouve.

³Navaihom hou abonun ajamkhomun, thalthem hon amaho akan khomun; nanga kona gamlha tah-a jamdoh jouse chu abonin akangomun ahi.

⁴Hijeh-a chu kati ahi, keija konin achomlam veuvin; kamite chanu kisuhmang jeh-a haka-a kakading ahi, lhepbi dingin neigo hih-un.

⁵Ajehchu tuni hi lungkhamna le kengto-a kichil thangna chule gao thilmuna phaichama janelho Pakai Pathen dinga lungnohphahna le, kul bangho kisuhchimna le mol chungho-a kana nikho chu ahi.

⁶Elam mihon livathei akengun, mihem touna sakol kangtalai le sakolchung touhotoh alhonuvin, Kir mihon lumdal chu ahohdoh-uvin ahi.

⁷Chule hung hitiding ahi, Na phaicham deichungnung chu kangtalai dimset ding ahi, sakolchung touho chu kotpiphunga galvonpuma kigoldiu ahi.

⁸Chuin aman Judah pondal kikhuna chu ahohdoh-in, chule hiche nikho chun gammanga galmanchah in chu navetai.

⁹Nanghon David khopi selaiho jongchu namutaove, hichu tamtah ahi. Chuin twikul noinunga twiho chu nagom khom taove.

¹⁰Chuin Jerusalem in hochu nasim uvin, chule in hochu kulbang semna dingin naphe lhaove.

¹¹Twikul luija hunglong dingin kulbangho kah-a chun twilam khatjong nalaijun; ahinla chuche sempa lamchu nave hih-un, sotna patna hingong tohpa jong chu nanahsah pouve.

¹²Hiche laichun janel Pakai Pathen'in akapdin, alunghemdin, alu voutoldin chule khaodip ponna atai kigahdin mi akouve.

¹³ Chule ven thanopnale kipanaho, bongchal ho kithana le kelngoi ho kithana, sanehna le lengpitwi dona hohi hungun neuhitin, donuhite, ajehchu jingle ithidiu ahitai.

¹⁴Chule hichehi janel Pakaiyin kanabenga anaphondohsa ahin, thonlouhella hiche khansetnahi nathi kahseuva nangho-a kona kisutheng louhel ding ahi, tin janel Pakai Pathen'in aseije.

¹⁵Janel Pakai Pathen chun hitin aseije, chenlang hiche neichingpa hengle insung chunga vaipo, Shebna heng ngeija chun gaseijin,

¹⁶Ama dinga sangtah-a lhan kilaija, amadinga songpi sunga chendetna in kisem banga, hichemunahi ipi naneija, koi naneija lhan nakilai ham?

¹⁷Vetan, Pakaiyin thahat tah-a gal hinga nakaimanga, nakhu khum teiding ahi.

¹⁸Aman nangma thonlouva pumhatna gamlen lama lumbeng banga kipeibong bonga napeiding ahin, chua nathiden ding, chua chu naloupina kangtalai chu napupa insung jachatna sohding ahi.

¹⁹Keiman naum na-a konin nangma deldoh ingting, napipui na-a kona aman naloilhah ding ahi.

²⁰Chule hiche nikho chule hitiding ahi: Keiman kalhacha Hilkiah chapa Eliakim chu kakouding ahi.

²¹Keiman nasangkhol chol ama ahpeh ingting, nakonggah-in ama hatsah ingting navaipoh na akhutna kapeh ding ahi. Chule ama Jerusalem'a chenghole Judah insung mite pa-a pangding ahitai.

²² Chule David insung kot heh alengkouva kakhaija, chutia chu aman ahonle koimachan akha theilou ding, aman akhale koimachan ahontheilou ding ahi.

²³Chule keiman amachu mundet tah-a kikilbeh banga kasuhdet ding; amachu apa insung dinga laltouna loupi chu hiding ahi.

²⁴Chule amahon amachunga chu apa insung loupina jouse, atu achate le asonho, bel neocha jouse belcha khonho-a pat twipai geija achunga akhaidiu ahi.

²⁵Janel Pakaiyin aseije, hiche nikho chule, mundet tah-a kikildet thihkil chu kibotdoh intin, kisatlha-a lhamang ding ahi. Chule achunga um pohgih chu kisatlhading ahi. Ajehchu hichehi Pakaiyin aseisa ahitai.