Read Thado Chin Isaiah 24 Bible Online

Isaiah 24 - Thado Chin bible

Isaiah 24

¹Veuvin, Pakaiyin leiset hi keuhel le agoh-in anasemin, chule akhup athalin aleh-in, chua chengho chu athecheh tai.

²Chutia chu, mipi aum banga thempu uma; sohpa aum banga pakaipa uma; sohnu aum banga pakainu uma; achopa aum banga ajohpa uma; ahompa aum banga abatpa uma; sumthoi lapa aum banga sumthoi pepa uma; batna lapa aum banga batna pepa umah ahi.

³Leiset chu keuhela suhchatvai gam hela umding ahi; ajehchu Pakaiyin hiche thuhi anasei ahitai.

⁴Vannoihi alunghemin agolhatai. Vannoihi akemsuh-in agolhatai. Leisetna mikiletsahho akemsuh taove.

⁵Leiset hi achengho noija suhboh-in aumtai; ajehchu amahon danho chu asukhelun, chondanthu akhelun, tonsot thulhun asukehtaove.

⁶Hijeh chun leiset hi gaosapmin avalhumtai, asunga chengho chu akamdeltai; hijeh chun leija chengho akavamun, mi lhomcha bou aumtai.

⁷Lengpitwi thah alunghemin, lengpitwi alhasamin, lungsunga kipahho jouse akhoisataove.

⁸Khongchaho thanopna akichaijin, kipahtah-a umho husa chu abeijin, selangdah thanopna atangtai.

⁹Amahon judon le lasah akop loudiu ahi; khamnathei donhi adonho dinga khatah ahi.

¹⁰Lung nohphahna khopi chu akisumang tai; Koimacha alunglut thei louna dingin in jouse akikhahchahtai.

¹¹Ju jeh-in lamlhongpi ho-ah kho akisame; kipana jouse athimin, gamsung thanopna jouse abeitai.

¹²Khopisung ahomkeovin akidalhan, chule kotpi chu manthah na-in akivosen ahi.

¹³Gam lailung miholah-a hitia ahung um tengtah le, Olive thingphung kihotling tobangle lengpiga loujaova apul kilohkhom tobanga chu hung umding ahi.

¹⁴Amahon a-aw hinsam doh-un tin, Pakai loupina lan saovintin; twikhanglen'a kona gingtah-a asapdohdiu ahi.

¹⁵Hijeh chun nanghon Pakai, Israel Pakai Pathen min ngeichu mei le twipi chule twikol gamho-a chun choi-an uvin.

¹⁶Leiset kolmonga konin la kisaho ijaovin, michonpha te henga loupina umhen. Ahinla keima kalhasam tultul, kalhasam tultul tai; ohe! ada-a kahi, jouva mibol hon jouvin eiboluvin; adihlouva mibol hon jouvin eihabol lheh-un ahi, katin ahi.

¹⁷Vo leisetna chengho, kichatna le kokhuh, chule thang nachung uva aume.

¹⁸Chule hitiding ahi: Tijatna husa-a kona jam-a chu kokhuh-a lhalutding, chule kokhuh-a kona hungdoh-a chu thanga ohding ahi; ajehchu chungsanga bangkot ho akihongin, chule leiset bulho akihotlinge.

¹⁹Leiset nasatah-in akehlhan, leiset hi ajunlha thengin, leiset hi nasatah-in akilong tai.

²⁰Leiset hi jukham banga kipei lonle-a, buh neocha banga kichon mangding ahi. Chule chua suhkhelna chu gihsatah-a achunga umding, chule hichu lhu-a kiphongkit louhel ding ahitai.

²¹Chule hicheni chule hitiding ahi, Pakaiyin chunga um janel le leiset lengho chu talen apehding ahi.

²²Chule sohchangho kokhuh sunga akikoikhom banga, amaho kikhom khomdiu, songkul sunga kikhachah khumdiu, nitamtah joule amaho kivil ding ahiuve.

²³Chutengle janel Pakai chu Zion lhang le Jerusalem'a chule upaho anga loupitah-a alengchan tengle lha thimintin, nisa maimoh ding ahi.